Vawiin khan Mizoram State AIDS Control Society (MSACS) leh District AIDS Prevention Control Unit (DAPCU) buatsaihin I&PR Conference Hall, CHANEM Building, Champhai-ah One Day Workshop on HIV/AIDS neih a ni a, Dr. Eric Zomawia, Project Director, MSACS chuan a hmanpui.
He workshop kaihruaitu Dr. C. Zirliana, CMO, Champhai chuan HIV/AIDS hi a thawktu bik tura ruat (MSACS leh DAPCU Staff) te chauh tan chuan do hneh chi a nih loh avangin Kohhran leh khawtlang anga tanho a tul thu sawiin Champhai District ah hian thingtlang khaw te ber pawh HIV/AIDS natna hian a luh chilh tawh thu a sawi.
Dr. Eric Zomawia, Project Director chuan Champhai District hi HIV/AIDS a category A a awm anih avangin Mizoram sorkar pawhin a ngai pawimawh a, HIV/AIDS darh zel tur venna te, a vei tawh enkawlna te leh hmanraw leh thawktu awm thei ang ang pawh Champhai-ah dah a ni, a ti a. Nikum chhunga HIV Sentinel Surveilance neihah District dang aia a san zawk avangin nasa taka tan lak ala ngai a ni a ti.
Pu Allan Lalmuanpuia, Programme Officer, National AIDS Control Organisation (NACO) pawhin thu sawiin Drop-in Centre hrang hrang te hmalakna sawifiahna a nei a, Champhai bikin Drop-in Centre a mamawhna a sanzia te, Drop-in Centre hi awmlo se chuan HIV/AIDS darh nasat tur zia sawifiahna a nei a, Drugs ngawlvei te hi midang zingah an inthlahrung a, mi zinga awm nuam an ti lova, hetih lai hian khawchhunga thilsual tihna hrang hrangah a bul tumtu an ni a, hei vang hian NACO hmalakna pawimawh tak pakhat chu HIV/AIDS veite leh Drugs ngawlvei te atanga sualna lo pung zel tur ven hi a ni a ti. Dr. Zonunmawii, District Programme Manager pawhin thu sawiin HIV/AIDS a Champhai District dinhmun leh an hmalakna hrang hrang tarlanna a nei a ni.
He One Day Workshop ah hian Champhai khaw chhunga Drop-in Centre pahniha thawktute, Champhai khawpui chhunga YMA Branch 6-a OB te, Sub-Headquarters YMA hruaitute, IDU leh PNM aiawhte an kalkhawm a, chawhnu lamah Champhai District Hospital Medical Superintendent Dr. Lalbiaktluangi kaihruaina in sawihona hun neih a ni.
Zanin hian MSACS leh DAPCU a thawktute chu Hospital veng Kohhran, Kahrawt Kohhran leh Vengthlang Kohhran ah te insem darhin Kohhran Committee te nen HIV/AIDS chungchang sawihona an nei leh dawn a ni.
