1598/2023-2024

Champhai the 22nd August, 2023 – Sawrkar Laipui Ministry of Education hnuaia National Education Policy (NEP-2020) hmalakna kal zela Programme pawimawh tak Nipun Bharat chu vawiin khan Champhai District tan Deputy Commissioner & Chairman, District Education Committee Pu James Lalrinchhana chuan Education Training Hall, Champhai ah a tlangzarh. He hmalakna hi Samagra Shiksha hnuaia kalpui a ni.

NIPUN Bharat (National Initiative for Proficiency in Reading with Understanding and Numeracy) hian naupangin zirna innghahna lungphum pathum- ziak, chhiar leh chhiarkawp an thiam theih nan zirna boruak tha an neih theihna tur siam te, zirna in chu dam chhunga an tangkaipui tur zir chhuahna hmunah siam a, naupangte pawhin hriatthiamna tak tak nen zirna awmze nei leh hlimawm an neih theihna tur siam a dah pawimawh a ni.

Hawnna inkhawm Pu H. Lalhminghlua, Additional District Project Coordinator, Samagra Shiksha kaihhruaiah Champhai DC Pu James Lalrinchhana chuan thu sawiin NIPUN Bharat kaltlangin Champhai District naupangten an zirlaiah thiamna tak tak an neih theih ngei a beisei thu sawiin he hmalaknaa mawhphurhna chelhtu Samagra Shiksha hotute leh school zirtirtute chu a nih tur ang taka uluk leh fimkhur taka kalpui turin a chah a. Zirlaite zirna tha pek hi mi puitling kan chherchhuahna tura thil pawimawh berte zing ami ani tih kan hriat tlan a pawimawh takzet a ni tiin, zirtirtute pawh kan hnathawhna kawngah thil thar leh chin dan thar kan tih ngam thin a, midang thil tih that atang te pawha kan inzir a, kan entawn ve fo thin a ngai a ni, a ti a. Zirtirna tha taka kan kalpui tur chuan zirtirtute pawh kan inzir taimak a, kan intuaithar ve zel a ngai a ni tiin, NIPUN Bharat thiltumte tha taka Champhai District-a tih hlawhtlin anih theihnan a scheme thiltumte zirchianga, tha taka kalpui chho turin kalkhawmte a chah a ni.

Pu C. Lalbiakzauva, District Project Coordinator pawhin NIPUN Bharat thiltumte leh a scheme chungchang sawifiahna hun a hmang a. Pi Laldingliani Ralte, Deputy District Project Coordinator, Samagra Shiksha kaihruaina-in Zo Nipun Bharat thutiam lakna neih a ni bawk.

Ministry of Education, Government of India chuan NEP 2020 hmalakna kal zelah Programme pawimawh tak NIPUN Bharat (National Initiative for Proficiency in Reading with Understanding) hi a duang chhuak a, He programme hi School naupang pawl hnih zirlai leh a hnuai lam ten ziak, chhiar leh chhiarkawp-a nihna leh awmzia chiang taka an hriatthiam theihna tura hmalakna a ni. Sikulte chu naupangin nuam ti tak leh, tawnhriat hmanga thiamna an zirna hmun anih theihnan te, zalen taka thil an sawi ngamna leh zawhna an zawh ngamna, an tualchaina leh naupangte zah taka enkawl an nihna hmuna siam te chu a thiltumte a ni bawk.

NIPUN Bharat hi Champhai District huamchhunga Class 2 leh a hnuailam zirlai awmna School zawng zawngah kalpui tur a ni ang.

Vawiin program-ah hian Champhai District Education Committee member officials-te leh NGO hruaitute bakah Champhai khawpui chhunga Primary School Hedmaster-te, NIPUN Bharat hnuaia Cluster Resource Coordinator-te leh sawm bik dangte an tel a ni.