Vawiin khan Champhai District Green Mizoram Committee hmalakna in Thingphun beihpui thlak a ni a, Champhai North bialtu MLA Pu TT.Zothansanga chu Khuallian niin he hun hi a hmanpui.
Thingphun beihpui thlakna inkhawm, chawhma 10:00 a CHANEM tuala neih hi DFO Pu C.Vanlalena, District Level Comt. Member Secretary in a kaihruai a, Khuallian Pu TT.Zothansanga chuan Forest leh kan chenna khawvel humhim zel turin mitinin mawh kan phur a ni, a ti. MLA chuan kum 1950 atang khan khawvel Ecological Balance chu a chingpen tan tih hriat chhuah a ni a, hei vang hian UN chuan a siamthat dan tur an ngaihtuah a, kum 1972 June thla-a Stockholm Conference ah te, 1976-a Vancouver conference ah te, 1977 ah Nairobi leh Georgia ah te an lo rel tawh a, India ramah chuan 1927 daih tawh khan Indian Forest Act siam alo ni tawh a, 1952 khan National Forest Policy siam a ni leh a, 1972 khan Wildlife protection Act, 1980 khan Forest Conservation Act siam a niin 1986 khan Environmental Protection Act siam a ni leh a ni a, India ram Danpui (Constitution) ah kan ram thing leh mau a chereu mai mai loh nan Dan khauh tak hnuaiah humhalh tlat an ni a, Act 51 (G) ah chuan Forest leh kan chenna khawvel humhim turin mitinin mawhphurhna kan nei a ni tih a chuang a ni, a ti a, India ramah thingphun beihpui thlak hun Vana Mahotsava te an lo siam chhuak ta hial a ni, a ti bawk. Pu TT.Zothansanga chuan kan chenna khawvel boruak chhe zel tur ven hna hi Sorkar thawhtur chauh a ni lova, mitin mawhphurhna a ni. Sangha kan khawi te pawh chaw tha tinrengin chawm mah ila an chenna Tui-ah Tur phul anih chuan an dam khawchhuak thei chuang lo a ni. US ah chuan mipui ten ram tana an tih ve theih chhun chu Environment humhalh a ni tih chiang takin an hria a ni, a ti a,Thingphun tura thawk chhuak Office staff leh Zirlai rual kalkhawmte chu an thingphun a nun ngei theihna tura uluk taka phun tur leh enkawl zui turin a chah nghal a ni.
Thusawitu dang, Champhai DC Pu Vijay Kumar Bidhuri, District Level Committee Chairman ni bawk chuan Mizoramin kum tina Thing leh Mau te humhalha hma kan lak meknaah nasa leh zuala tan kan lakna atan Thingphun hun hi buatsaih thin a ni. Mizoram hi thingtlang loneitu, kumtin-a Lo vat thin kan nih avangin kan ramngaw tha te nasa takin kan ti chereu tawh a, hei vang hian kan sik leh sa te pawhin a tuar tan tawh a ni. Kan ramngaw tha tak tak te hi Ecological balance min petu a ni a, hei vang hian kan humhalh a, a chhe zel tur venga hmalak a ngai ta a ni. Green Mizoram Programme hnuaiah Mizoram hian a thawk tha in India ramah pawh lawmman kan dawng pha hial a, hei aia tha-a thawk turin tan kan lak zel erawh ala ngai a ni. Kuminah hian Thingphunna tur hmun hrang hrangah ruahman a ni a, tha taka chhinchhiah an niin an thla lakvek ani ang a, nakumah hma kan sawn dan kan enfiah leh dawn a ni, a ti a, Thing pakhat kan zuah hian a dang pakhat kan phun belh tihna a ni, tiin Department leh NGO pawl hrang hrangte chu mahni thingphun theuh humhalha duat taka enkawl zui turin a chah nghal a ni.
Champhai District Green Mizoram Committee Thingphun beihpui thlak hawnna inkhawm neih zawh hian Thingphun tura thawkchhuak ten anmahni thingphun tur Thingtiak an lak fel vek hnuah an phunna tura ruatsa-ah an kal darh a, Khuallian Pu TT.Zothansanga, MLA in a vailiam a ni.
