“Focus, Partner, Achieve: An AIDS-free Generation” tih thupui hmanga khawvel puma AIDS do ni, World AIDS Day 2014 chu vawiin khan Champhaiah pawh CMAI (Christian Medical Association of India) buatsaihin I&PR Auditorium-ah Champhai DC Pu Zoengsanga’n a hmanpui.

Pu Zoengsanga chuan AIDS natna veite khawtlangah an inthlahrunloh nan mipuiin rilru zau tak pu a kan dawnsawn thiam a pawimawh a, a natna veite pawh inkiltawih mai lovin, mahni theihnaah chuan tlangnel taka inhman a, kan zavaia rilru hrisel tak kan put tlan a ngai a ni, a ti a. Chutihrual chuan hlawkpui tham thawhchhuah nei silo a nawmsakna kan um hi bansanin, hun awl hman that kan zir chuan tunlaia kan rama sualna hrang hrang hluar ta em em ho hi kan do theiin, ram hi natna khirhkhan tak tak lakah kan chhanhim thei dawn a ni, Pu Zoengsanga chuan a ti a ni.

He huna Khualzahawm Pu VL Chama Hnamte, President, Sub. HQ, YMA Champhai pawhin thu sawiin, heng hun buatsaihte hi kalphung pangngai a kalpui mai lova, chhungkua leh khawtlang siamthatna a nih theih zawk nan mipuiin an pawimawhna kan hriatthiam a ngai a ni, a ti.

Vawiin hun hi Lalmuanpuii, District Coordinator, CMAI Project Axshya, Champhai in kaihruaiin, Pu F. Lalrinawma, Project Manager, Genesaret Society chuan report a pe a. Champhaiah kumin 2014 January atanga October thlenga thisen test tawh zinga HIV+ve an hmuhchhuah ah 48.6% chu inchiu vanga kai an nih thu a tarlang a ni. Vawiin hunah hi Pu Freddie Verity Longleng, Project Manager, CMAI Regional Office, Shillong in rawn hmanpuiin, lawmthusawiin hun a khar a ni.