Vawiin chawhnu khan Champhai Nature Conservancy (CNC) leh Govt. Champhai College (GCC) tangkawp buatsaihin World Earth Day- 2018, chu Govt Champhai College Multipurpose Hall-ah hman a ni.

He hun hi Pu Zirsangliana Paite,  Associate Professor, RUSA Co-ordinator chuan a kaihruaia. Pi Lalchhanhimi Khiangte Principal, GCC chuan thu sawiin Champhai college leh Mizoram Pollution Control Board (MPCB) chuan thawhhona tha tak an neih thu a tarlang a. Kum 2015 March thla atang tawh khan tui thianghlim leh thianghlim loh endik hna National Water Monitoring Project an kalpui tawh thu leh, June 2016 tang tawha boruak hip luh thianghlim leh thianghlim loh zirchianna Breathing Level Air Quality Monitoring Project an lo kalpui tawh thu a sawi a.  Nakin lawka ram hruaitu la ni mai tur College zirlaite chu nature humhalh hna chu zir mai duh tawk  lova a taka nunpui thin tur leh a hrelo zawkte hrilhhretu ni turin a chah nghal bawk a ni.

He hunah hian Champhai DFO, Pu C. Lalbiaka pawhin World Earth Day-2018 thupui, ‘End Plastic Pollution’ tih hmangin powerpoint presentation a pe a. Plastic avanga nghawng thalo awm thei chu ram pum anga buaipui a hun tawh tak zet thu a sawi a.   Champhai khawpui tui tlan ber Tuipui pawh Chite humhalh kalpui anga tha thawh a hun thu sawiin, Plastic hman thatlohna inzirtir chu thil tih makmawh a ni, a ti a. Champhai Nature Conservancy (CNC) te hmalakna chu fakawm a tih thu sawiin, an hmalakna tur tarlante pawh a phurawm hle thu a sawi bawk ani.

Champhai Nature Conservancy (CNC) aiawhin Nl Zairemthangi, Vice President, CNC pawhin kumin World Earth Day thupui sawi zauna aneih mai bakah pawl anga an hmalaknate a tarlanga. Champhai Leilet Phaizawl mawi tak, Champhai ti Champhai tu leh Champhai hmun bika thil awmte chu   humhalhna chang hriat a tul thu a sawi a. CNC-in kumin atana an kalpui ‘Project Tlaizawng’ a sawifiah bawk a ni. College Zirlaite chu an hmalaknate thlawp tur leh thiamna an zirchhuahte  chhawr tangkaia khuarel mawina humhalh tura penchhuak ve turin a sawm nghal bawk a ni.

World Eart Day hi kum 1970 tanga hman tan a ni a.  World Earth Day-2018 pual hian  Essay leh Drawing hmanga intihsiakna neih niin lawmmante semchhuah a ni.

Kum tin khawvel pumah Plastic ton maktaduai 300 dawn siam chhuah thin a ni a. Za zela 90 dawn chu hman zawha  thehthang mai mai a ni thin a . Plastic ton sing sarih vel zet chu luiah leh tuifinriatah te a luanglut a, tuia cheng nungchaten lo eiin an thihpui phah thin a ni.

Khawpuia hnawmhnawk za zela 34 lai hi Plastic hnawm a ni a, heng te hi uluk taka paih/ tihral anih loh chuan kan tui tlanahte a lut leh thin a ni. Plastic hi nitin nunah kan hmang nasa tawh em em a, vawi leh khatah chuan nuaibo vek theih a ni lo maithei; amaherawhchu a tlem thei ang ber hman leh hman hun chhung tihrei emaw, siam belh lova hman hnu recycling-te hian plastic bawlhhlawh tam lutuk tur a vengin a tiziaawm thei bawk a ni.