No.4722/2020-2021

Dated Champhai, the 3rd September,2020: Vawiin chawhnu dar 2 khan Champhai district Bawrhsap Pi Maria C.T Zuali hovin District Level Committee on African Swine Fever & other transboundary Animal Diseases (TADs) chu DC Conference Hall-ah thukhawmin, African Swine Fever leh ran natna ramri kaltlanga inkaidarh theih hrang hrangte ven dan tur chungchang an ngaihtuahho a ni.

Bawrhsap chuan African Swine Fever laka Champhai district him theihna tura theihtawp chhuaha tanlak mek zel anih thu sawiin, ram dang leh State dang atanga Vawk, vawksa leh vawksa atanga siam reng rengte Champhai district-a lakluh khapna thupek chhuah bakah Champhai district chhung khawi khuaah mah Vawk, vawksa leh vawksa atanga siam reng rengte lakluh leh phurhchhuah khap tlat a ni, a ti a. Ramri vengtu Assam Rifles hotute chu uluk lehzuala ramri veng tur leh dan lo a thil tih leh ran lakluhte venhim kawngah theihtawp chhuah turin a hrilh a. Ramri hrul khuate hnenah Vawk natna African Swine Fever hlauhawm zia a zau thei ang bera hrilhhriat a tul thu a sawi bawk. Dan leh thupek kengkawhtute chu danin a phal loh leh khap mekte ven leh man kawngah rang taka hma la thin turin a chah a. Thawhhona tha tak hnuaiah infuihthara kan tanho zel chuan ASF hri leng thei tur lakah kan him thei ngei dawn ani, a ti bawk.

Dr.B.Zonghinga, DVO & Member Secretary, District Level Coordination Committee on African Swine Fever chuan African Swine Fever awmzia sawifiahin AH &Vety Department hmalakna leh hmachhawpte a tarlang a. African Swine Fever chu Vawk leh Sanghalte vei theih a vei tawhte thihpui thin a ni, a ti a. African Swine Fever chu kum 1921 ah Kenya rama hmuh chhuah a ni a, 2018 ah China a hmuhchhuah anih thu leh Myanmar Shan State-ah nikum 2019 ah hmuhchhuah a ni, DVO chuan a ti a. Mizoramah engtik lai pawha lo lut ve thei reng anih thu sawiin, Covid-19 vanga ramri ven anih avangin kan la him hram a, ramri veng an tin tak hnuin ramri kaltlanga Vawk lakluh atanga lo lut thei reng anih thu a sawi a. Dr. B.Zonghinga chuan North East State a ASF lo luh dan tlangpui sawi langin, 2020 January-ah Arunachal Pradesh, May-ah Assam leh August-ah Meghalaya-ah te lo lutin vawk singhnih chuangin an thih phah thu a sawi a. Undivided Champhai district-ah Vawk 12,300 leh Champhai district bikah Vawk 8,000 awm meka chhinchhiah anih thu a sawi bawk.

Meeting-ah hian African Swine Fever chungchang inzirtirna neih dan tur Work Plan duan chu pawm a ni a. YMA Branch hrang hrangah African Swine Fever hlauhawmna leh him theihna tura hmalak ngaite inhrilhfiahna ziakin pek veka a zau thei ang bera puanzar nise tih a ni a. Ramri kaltlanga Vawk lakluh ven kawnga thuneitute tawiawm thate hnenah lawmman siam sak ni se tih a ni bawk a. DLAO kaltlangin ramri hrula Vawk chhuaha tlat tir thinte lehkha peka senghawi tura hriattir nise tih a ni bawk. Vawk leh a kaihhnawiha eizawng leh buaipuitu heng Vawk vulh mite, Ran talh leh zuar, NGO leh mipuiah zirtirna abik takin ramri hrul khuaahte kalpui nise ti a rel a ni bawk. Venhimna lam thawktu Police leh Assam Rifles hotute chuan ramri kaltlanga dan lo a thil tih leh ran tawlh ven kawngah theihtawp chhuaha hma an lak zel dawn thu an sawi a. Meeting-ah hian AH& Vety thuneitute chuan August Ni 19, 2020 ah ramri kaltlanga Vawk lakluh 7 an man thu sawiin, heng zinga 4 te chuan ran natna Porcine Reproductive & Respiratory Syndrome (PRRS) an vei tih hmuh chhuah anih thu leh Court Case kal lai mek anih thu an sawilang bawk. Mihring in ASF a vei thei lova, amaherawhchu thawmhnaw, pheikhawk leh hmanraw hmangtein a pu darh thei a ni. A venna Vaccine leh enkawlna bik damdawi a awm lo a, Vawk damlo awm chuan AH &Vety Department thawktute hriattir zel tur a ni.

Vawiin meeting-ah hian District Level Committee on African Swine Fever & other transboundary Animal Diseases (TADs) Member-te an tel tha hle a ni.