493/2025-2026

Champhai, 7th May 2025: Nimin (May ni 6, 2025) khan Champhai Bawrhsap Pu Mohammad Aaquib a kaihhruaiin Clover Organic Pvt. Ltd. Dehradun team CEO Pu Sanjay Aggarwal, Director Pi Pinky Aggarwal, Vice President Pu Sanjay Kumar leh HR manager Pi Anushka Hatwal ten Champhai District-a sangha khawina chungchanga hmasawnna a awm theih nan leh tui harsatna sukiang tura Keilungliah reservoir/tuikhuah tihchangtlun dan tur an sawiho.

He hunah hian Champhai DFDO Pi Lalremsangpuii chuan  Champhaia Sangha khawitu ten ṭhal laia harsatna an tawh ṭhin sawiin,  tuichhunchhuah tui sangha khawina atana hmang lova tuna Keilungliah tuikhuah tui te nasa zawka an hman theih a ṭul a ni, a ti a:  Keilungliah tui chu uluk taka enfiah a nih hnuah sangha tuikhuah enkawlna atan a thianghlim thu a sawi bawk a ni. 

He meeting zawhah hian Keilungliah tuikhuahah kalin Keilungliah tui hi sangha khawitute tana tangkai zawka hman theih dan tur leh bawlhlo (chemical) tel lova sawngbawl dan tur an sawiho a ni.

Pu Sanjay Aggarwal, Clover CEO chuan he hunah hian Clover organic te hian kum 16 chuang Mizoramah organic Agriculture an lo kalpui tawh a, sulhnu pawh ṭha tak an neih avangin sangha khawi (Fisheries) lama huang zauh a, he lama tui mi te theihtawp chhuaha ṭanpui turin hma an la mek tih a sawi a. State danga an lo kalpui tawh ṭhin angin mihring thli luia luang lut ṭhin te tihfaina, anmahni siam ngei Bio-balls NIH hmang ve turin he hunah hian zirtirna a pe a. Clover Organic Pvt. Ltd. Te chuan Keilungliah tuikhuah hi hmarchhakah pawh a hmasa pawl ni a an hriat thu sawiin, thawhhona ṭha taka hnuaiah mipuite leh loneitute tan tuikhuah enkawl dan kawng a awm zel an beisei thu a sawi bawk a ni. 

He hunah hian Champhai Addl DC Pu K. Zorammuana bakah Keilungliah enkawltu Nodal department PHE department atangin Er. Zothansanga, SDO leh Pu Kaleba Lalhruaizela, JE te an tel bawk a ni.