1049/2024-2025

Champhai, 3rd July, 2024: Sawrkar Laipui Ministry of Information & Broadcasting sum cheng nuai 100 senga ‘Experiential Learning Centre (ELC)’ Champhaia din tur chungchang ngaihtuahin vawiin khan ELC Management Committee te chu an Chairman Champhai Bawrhsap Pu James Lalrinchhana kaihhruaiin Champhai DC Conference Hall, Keifangtlangah an thukhawm. Champhai ELC hi Mizorama ‘Experiential Learning Centre (ELC)’ hmasa ber tur a ni a, naktuk (July ni 4, 2024) hian Champhai Bawrhsap Pu James Lalrinchhana’n a hawng dawn a ni.

Thutkhawm kaihruaitu Pu James Lalrinchhana chuan Champhai District-ah Mizorama ‘Experiential Learning Centre (ELC)’ hmasa ber din a ni tur chu lawmawm a tih thu a sawi a. ELC chu khawvel hmasawnna thang zel ruala mipui ten an thiamna an chher hriamna hmun a nih a beisei thu sawiin; zirlai naupang hmun hla zawka awm ten tunlai thiamna ‘Artificial Intelligence’ leh ‘Virtual Reality’  lama tawnhriat an neih a, heng thiamna hmaa kimki mai lova an theihna cho chhuaktu zawk a nih ngei a beisei thu a sawi bawk a ni.

Champhai Bawrhsap hian Experiential Learning Centre din a nih theih nan a hmalakna hrang hrang pawh he hunah hian a tarlang a. ELC din tur hian August ni 7, 2023 atanga hmalak tan a ni a, CHANEM Building 2nd Floor, Champhai Vengthlangah khawl tam zawk hi bun fel tawh a ni. ELC-ah hian Artificial Intelligence leh Virtual Reality hmang ‘Gaming Zone’ te, ‘HoloWorld’ leh video fiah zawk (High Definition) hmanga thil awm dan inhrilhfiahna hmun ‘Viewing Room’ te a awm dawn a ni.

Vawiin thutkhawmah hian ELC din tura hmalakna hrang hrang thlirletna te, a hawn dan tur te leh enkawl chhoh zel dan tur te rel a ni a. ELC hawnna inkhawm hi Champhai Addl DC Pu K. Zorammuana kaihhruaiin July ni 4, 2024 chawhma dar 10:00 hian CHANEM Building-ah neih a ni dawn a, Champhai Bawrhsap Pu James Lalrinchhana’n ELC hi a hawng ang.