No.6518/2020-2021

Dated Champhai, the 12th November, 2020:  Mizoram hmun hrang hranga Buh leh thlai chinna Leilet, Wet Rice Cultivation (WRC) hmunte thil danga hmang lova humhalh  tlat anih theihna tur leh Notified Town Area huamchhung bika leilet awmte buh leh thlai chinna tur bik atan chauha hman chhunzawm zel anih theihna tura Agriculture Minister Pu C.Lalrinsanga leh Law Minister Pu T.J.Lalnuntluanga hova  inrawnkhawmna, August Ni 3, 2020 a neih thurel bawhzuina kalzelah  tukin khan Champhai Bawrhsap Pi Maria C.T.Zuali, Director (Crop Husbandry)  Agriculture Department  Pu Rohmingthanga Colney leh Official te’n Champhai leilet zawl  tlawhin buh leh thlai chinna nilo hmalakna awmte an enfiah a ni.

Tukin leilet tlawha endikna hunah hian buh leh thlai chauh chinna tur leilet zawl anihna ang taka hmang lova thil dang atana hman mek leh hman tumna awmte uluk taka enfiah a ni a. Leivung hmanga leilet chhilha thil danga hman tumna awm district thuneitu te’n hmalakna tawpsan tura an hriattirte, sumdawnna bungraw dahna Godown/Kudam atana hmante pawh enfiah niin, leilet huam china In sa mek pakhat chu District Magistrate Pi Maria C.T  Zuali chuan kut thlak chhunzawm tawh lo tura hriattirin kalzel dan tur ngaihtuah ani ang, a ti a. Phalna la hmasa lova Leilet hmun thil  danga hmangte chu  Square Metre khat zelah cheng 1000 zel chawi tir theih an nih thu leh dan hmanga hrem an nih theih thu a sawi a. Leilet hmun leh a hnaivaia Land Pass neite enfiah zel anih tur thu leh anihna tur ang nilova hmangte chungah dan anga hmalak tum anih thu a sawi bawk.

Buh leh bal tam zawk thar chhuak tura Sawrkarin hma a lak mek laiin Mizoram-a leilet hmun thenkhat chu buh leh thlai chinna atan ni lova hman thin a ni a, sawrkar chuan  ‘The Mizoram Land Revenue Act, 2013’ hmanga humhalh  tlat  a tum a ni. Mizorama leilet thenkhat buh leh thlai chinna atan ni lova hman a ni hi Sawrkar chuan pawi a tiin tihtawp dan tur kawng a zawng meka, hemi atana hma la tur hian Director of Agriculture (Crop Husbandry) Pu Rohmingthanga Colney kaihhruai Task Force  din a ni a, chak taka hma la mek zelin Task Force hian an thil hmuh leh zirchhuahte a tul anga hmalak anih theihna turin sawrkarah an thlen  dawn a ni.

Champhai leilet zawl, buh leh thlai chinna atana hman chu Agriculture Land-a puana humhalh tlat anih theihna turin Agriculture Department leh Land Revenue & Settlement Department tangkawp chuan an teh chhuak thar leh vek dawna, heng leilet zawlte hi buh leh thlai chinna atan bak thil danga hman a nih tawh lohna turin ‘The Mizoram Land Revenue Act, 2013’ hmangin  khauh taka humhalh tlat  tum  a ni.

Tukin Champhai leilet phaizawl enfiahna hunah hian Task Force Member Pu Lalsanglura Sailo DAO Aizawl,  Pu George Lalthanngura DAO Champhai, Pu Laldingliana Hrahsel EE I&WRD Champhai leh Dr. Lallawmkima DIPRO Champhaite pawh an tel a ni.