No.2969/2020-2020 

Champhai South Assemble Constituency huamchhunga Model Village atana thlan Tlangsam khuaah vawiin khan Model Village chungchang inhrilhhriatna leh hmalak zel dan tur  Champhai district Bawrhsap Pi Maria C.T Zuali hovin neih a ni.

Bawrhsap Pi Maria C.T Zuali chuan Covid-19 hrileng leh district chhunga lirnghing avangin ruahmanna neih fel a har thu a sawi a, model nih avangin a tir atangin engkim a fel nghal vek bik lova, model hlawhtling ni turte'n kawng engkima traning an la hmasa thin angin Model Village ni turin theihtawp chhuaha inzir angaih thu leh khawdangte tana entawn tham ni tur khawpa lungrual taka thawhho a tul thu a sawi a. Tlangsam chu khaw mawi leh nalh tak a nih thu sawiin khaw mawi leh nalh, In leh lo tha ringawt hi hmasawnna a ni lova, in leh lo tha neiin Infrastructure tha tak tak nei mah ila eizawnna tur tha kan neih si loh chuan hmasawnna a tling lo a ni, a ti a.  Tlangsam khaw mipui 95% vel kut hnathawka eizawngtute an nih avangin Agriculture lamah pawh theihtawp chhuah a nih tur thusawiin Dept hrang hrangte'n Model Village an vilzui tur thu a sawi a. Hriselna kawngah te, tui thianghlim pek kawgah te, zirna kawngahte, thing leh mau humhalh leh a pawimawhna zir kawngahte bakah infiamna leh insawizawina kawngah leh hmasawnna hrang hrangah theihtawp chhuahpui an nih tur thu a sawi bawk.

Pi Maria C.T Zuali chuan kawng engkimah sawrkara innghah bur bansan a tul tawh thusawiin, sawrkar thil chu mimalin kan ta ang a en a ngaih thu leh sawrkarin Model village an nihna anga a enkawl zui tawh lo a nih pawhin an khaw tan a ni tih hre renga hmasawn tura hma la chhunzawm zel turin a chah a. Hmasawnna kawnga pawimawh ber mimal hmasawnna ngai pawimawh ber turin a chah a. Tlangsam khawtlang hruaitute chu tun atanga kum 10 ah chuan model village an nihna ang taka khawdangte tana entawn tlak, khaw mawi leh changkang, khaw indodelh ni tura beisei an nih thu à hrilh bawk.

Pu R.Lalnghakliana PD, DRDA chuan a tha lama entawntlak ni tura MLA in Model village a a thlan anga theihtawp chhuah turin a ngen a, Sawrkar atanga hmasawnna kal ringawta innghat lo tura chahin Champhai South AC huamchhunga khaw entawntlak ber ni tura theihtawp chhuah turin a chah bawk.

Pu Lalduhthlana DFO, chuan Model Village chu thil tha tak a nih rualin a dawngsawngtu a zirin kawngro a suin a su lo thei a, Model Village hi hmasawnna hmuh tur awm si lovin a hmingah a ral mai ang tih a hlauhawm thusawiin, MLA in Model Village-a a thlan ang taka khaw hmasawn, mimal hmasawn an nih theihna tura tangruala hmasawnna hna thawk turin kalkhawmte chu a chah a. Sawrkarin Model Village-a a thlan chu duh tawk mai lova,  Model VC, Model NGO nih tum tur leh thinlung model neih tum turin a chah a. Nungcha leh ramngaw humhalh leh a siam belh chungchangah khaw dangte entawn tlak ni turin a sawm bawk.

Pu Vanlalchhuanliana DUDO chuan hmasawnna tam tak lut tur a awm thusawiin,  khawtlanga hmasawnna tur kawng hrang hrangte a nihna ang taka hmang turin khawtlang hruaitute a chah bawk.

Dr. R.Lianmawia CMO chuan Model Village in a kentel chu hriselna a nih thu sawiin Hriselna hi Pathian thu nena kalkawp tlat a nih thu a sawi a,  khawtlang mipuite an hrisel zawk theihna turin Vaccine ngai pawimawh tur leh Health Sub Centre hmangtangkai turin a chah bawk.

Pi R. Lalnunkimi BDO pawhin thusawiin Tlangsam chu Model Village ni awm reng khaw inlungrual nia a hriat thu a sawi a, Covid 19 dona kawngah pawh Incident Commander a nih ang a, Tlangsam khawtlangin an thawhpui that thu sawiin model village pawh hlawhtling taka kalpui theih a beisei thu a sawi bawk.

Pu  Lalremmawia Colney SDAO, chuan Tlangsam chu khaw taima tak an nih thu sawiin buh leh bal leh chawhmeh thar chhuah kawngah pawh Champhai chawmtu ber an nih thu a sawi a, hei aia nasa thlai thar chhuah a tam theihna tura theihtawp chhuahpui an nih tur thu a sawi bawk.

Pu HL Malsawma Tlangsam VCP Model Village-a thlangtu Bialtu MLA Pu TJ Lalnuntluanga chungah Tlangsam khawtlang an lawm thu a sawi a, Model Village-a a taka kalpui a nih theihna tura Sawrkar Dept hrang hrang hotute'n a hmun ngeia tlawha an zirtir chu lawmthu hrilhin he hun hi a khar a ni.

Tlangsam Branch YMA Hall-ah neih Model Village chungchang zirhona hun hi Pu H Vanlalhruaia, Tlangsam VC Vice President chuan a kaihruai a, He zirhona hunah hian Champhai DC, PD DRDA, DFO, DUDO, DPC SSA, CMO,  BDO, SDAO, SDO PWD leh Chanchinbumite bakah Tlangsam khawtlang hruaitute an tel thei a ni.

Tlangsam khua hi Champhai South bialtu MLA Pu TJ Lalnuntluanga, Law & Judicial Minister-in Champhai South AC huamchhunga Model Village atana a thlan niin tunah hian In 537 awmin mihring 2137 an cheng mek a ni.