No.1974/2020-2020

Dated Champhai, the 12th June, 2020: Vawiin khan Champhai District Bawrhsap Pi Maria C.T Zuali chuan Champhai khawpui chhunga State danga tangkhang rawn hawte khunghranna Kohhran enkawl hmun hrang hrangte chu Official-te nen an tlawh kual.

Pi Maria C.T Zuali chuan Mizoram Sawrkar ngenna ngaipawimawha Kohhranin kristianna leh Mizona rilru pu chunga Sawrkar puih an inhuam chu fakawm a ti a. State dang atanga lo hawte tan chenna tur tha tak an chhawpchhuah sakte, ei leh in, venhim leh tul dangte mai bakah an thlarau lam nun thlenga hmangaih taka an enkawl avangin lawmthu a sawi a. Harsatna leh mamawh an neihte inthlahrung hauh lova thuneitute hnena thlen thin turin a chah bawk.

Bawrhsap chuan Quarantine Centre-a awm te'n thuawih taka Sawrkar ruahmanna an zawm thin chu chhuanawm a tih thu sawiin, Quarantine Centre a awm mekte leh lo chhhuak tawhte pawh RT-PCR Test tihsak vek tuma Swab sample lak mek zel anih thu a sawi a. Sawrkarin Quarantine Centre a awm hunchhung ngeia RT-PCR Test result hre lova chhuah tha a tih loh avangin dawhthei taka lo awm hram hram tura ngenin, in tawrhna hi midangte tan malsawmna ani thei ani, a ti bawk.

Vawiin Community Quarantine Centre hrang hrang Bawrhsap hova tlawhnaah hian mawhphurtute nen inkawmhona nei zelin, mamawh angte a tul ang zela ngaihtuah sak an nih tur thu a sawi a. Bawlhhlawh paih leh senghawi dan mumal leh tha zawk te sawiho a ni. Community Quarantine Centre enkawltute chuan District Official te ngaihsaknaah lawmthu an sawi bawk.

Tun dinhmunah Champhai District-a Quarantine mek hi an vaiin mi 577 (Mipa 228 leh Hmeichhia 349) an ni a. Champhai khawpui leh a chhehvela Community Quarantine Centre 16 ah mi 300 (Mipa 121 leh Hmeichhia 179) an awm mek a, Home Quarantine 60 (Mipa leh Hmeichhia 30 ve ve) an awm bawk a ni. A dang 217 te Institutional Quaratine Centre ah an awm mek bawk a ni.

Bawrhsap Pi Maria C.T Zuali hi Pu Mark Lalthanliana Addl DC, Pu Laldingliana Hrahsel EE I&WRD & Nodal Officer, District Quarantine Centre, Pu Vanlalchhuanliana DUDO leh Dr.Lallawmkima, DIPRO te'n an tawiawm a ni.