Champhai District Election Officer leh Deputy Commissioner ni bawk Pu Sangdingliana chuan vawiin khan Champhai District huam chhunga Village Council Electoral Roll (Draft) chu DC Conference Hall-ah a tlangzarh. Pu Sangdingliana chuan State Election Commission-in a tarlan danin tun tum VC roll ennawnah chuan hming ziah luh belh a awm loh tur thu leh, siamthat tur awm ang angah tlawmngai pawl leh party hruaituten ERO/ AERO-te chu thahnemngai tak chunga E/Roll dik leh felfai tak neih theih nan thawhpui turin a sawm a ni.

Champhai District-ah hian Assembly Constituency 5 awmin, Lengteng A/C ah VC 20, Tuichang A/C ah 21, Champhai North A/C ah 24, Champhai South A/C ah 18, East Tuipui A/C ah 25 awmin, a vaiin VC 108 an awm a. Khaw pathumah VC thar - Lungvar, North Hruaikawn leh Kawlkulh North-ah siam belh a ni.

Draft Electoral Roll hi BDO/ERO Office tinah leh Champhai DC Office ah hnathawh hun chhungin en theiha tarchhuah nghal a ni a. February ni 2-4 chhung hian Claims & Objections thehluh theih a ni a, ni 5-7 chhungin siamthat ngaite chinfel a ni ang a, ni 9-14 chhungin Electoral Roll chu chhutchhuah niin, Final roll chu February ni 16-ah tlangzarh a ni ang.