No.5226/2020-2021

Dated Champhai the 19th September, 2020: Champhai Bawrhsap Pi Maria C.T Zuali chuan vawiin hian Hnahlan leh Ngur khuate tlawhin  khawtlang mamawhte a enkual.

Pi Maria C.T Zuali hian Hnahlan Winery, Hnahlan Village Haat, Hnahlan Higher Secondary School leh khawchhung inkalpawhna kawng laih mekte tlawhin khawtlang hruaitute nen harsatna leh mamawhte an enfiah a, hmalak theih dan turte an sawiho a ni.

Champhai District Bawrhsap chuan district mipuite mamawh leh harsatnate a hmun ngeia tlawha hriatchian a duh thu a sawi a. Mamawh leh harsatna thlente tun leh tuna tihhlawhtlin mai theih ni lo mahse a theih leh tul ang zela  bawhzui tum anih thu a sawi a. Khawtlang hmasawnna leh than zelna tur kawnga thahnemngai taka thawktute fakawm tiin, lungrual taka hna thawk chhunzawm zel turin a chah a. Zirthiamna chuan tawpchin a neih loh thu sawiin, nitina inzir thar reng tur kan ni a, chhiar hriatna mai niloin a taka hmang tangkaitu nih kan tum fo tur a ni, a ti bawk.

Pi Maria C.T Zuali hian vawiin chawhnu khan Champhai North bial chhung atanga Model Village atana puan Ngur khua tlawhin khawchhunga kawngpui kam hnaih lutuka insak leh tawt lutuk chinfel dan tur khawtlang hruaitute nen an enfiah nghal a ni.

Champhai District Bawrhsap Pi Maria C.T Zuali hi Dr.Lallawmkima DIPRO leh Pu Obed Lalmalsawma DSYO te'n an tawiawm a ni.