Kelkanga Special Assistance Scheme hnuaia petty trade thlangtu mi pakua (9) hnenah vawiin khan Champhai Bawrhsap chuan tanpuina Rs. 15,000 theuh a hlan. He hunah hian Champhai PHED SE, DIPRO leh media lam bakah Kelkang khawtlang hruaitute an tel a ni.

DC Pu H. Lalengmawia chuan vawiina Petty Trade tanpuina dawngtute chu dawr neisa an nih deuh vek avangin an pawisa dawn chu an dawr bungrua tihchangtlunna atan tangkai taka hmang turin a chah a. Mamawh leina tur hmun dang awmloh remchanga la a, MRP aia man to zawk a hralh duhna thinlung an put loh a beisei thu leh, MRP aia man to a hralh chu Dan kalh a nih thu a tarlang a. DC chuan Kelkang khawtlang hruaitute chu Sorkar hmalakna tawiawm tha a tih thu a sawi bawk a; khaw mipuite pawhin faina kawngah thahnem ngaia hma an la chu lawmawm a tih thu a sawi bawk.

Vawiin hian Pu Lalrammawia, SE PHED bakah Petty trade tanpuina dawngtute atangin leh Kelkang VC lam atangin thusawi ngaihthlak a ni.

Tun dinhmunah hian Kelkang tana Special Assistance kalpui mekah hian ar leh vawk vulh thlang te tan pek tlak vek a ni tawh a. Chhungkaw tin tana tuizem pek theuh tur chu chhungkaw 209 in dawng tawhin, chhungkaw 30 a la bak a. Ek in pawh tunah hian a vaiin unit 101 sak zawh tawh niin, unit dang 56 sak zawh tep, a chung khuhna tur rangva nghah mek a la awm a ni. PHE Department chuan Kelhthliah lui atanga Kelkang khaw chhunga tui pump luhna tur a buaipui mek a. Solar-power rinchhan a, metre 500 a sangah stage thuma tui pump-na tur ruahmanna siam mek a ni.