No.339/2020-2021 

Vawiin khan Champhai Bawrhsap Pu Mark Lalthanliana chuan  Champhai khawpui chhunga Village Level Task Force hrang hrangte leh Home-te tlawhkualin hmalak dan leh harsatnate a sawipuia,  Covid-19 dona kawnga hman tur  CM Relief Fund kaltlangin tanpuina pawisafai a hlan nghal a ni. Vawiin lama sem chhuah bak thuthmun leh khawpui pawn Village Level Task Force-te hnenah Incident Commander (IC) te'n an bial chhungah theuh an  semchhuak dawn a. Heng bakah hian vawiin lama tanpuina hlan rih loh Home dangte pawh DC Office kaltlangin tanpuina pek tum ani bawk.

Vawiin hian  khawpui chhunga Village Level Task Force 13;  Vengsang, Kahrawt,  Vengthlang, Kanan, Dinthar, New Champhai, Tlangsam,  Electric Veng, Zion Veng, Bethel Veng, Vengthar,  Venglai, Vengthlang North-te leh Home hrang hrang 4; Mazuia Memorial Home TNT,  Rose Children's Home, Observation Home leh Genesaret Gospel Home-ah te tanpuina pawisafai avaiin Rs 6,23,000/- hlan an ni. 

CM Relief Fund atang hian Champhai District chuan tanpuina pawisafai Rs 16,83,000/- a dawng a. Heng bakah hian DM&R kaltlangin Village Level Task Force 60 te hnenah tanpuina pawisafai Rs 5,000/- theuh semchhuah tawh a ni.

Pu Mark Lalthanliana hi Pu Benjamin Zalawma Ralte DLAO, Dr. Lallawmkima DIPRO, Pi Esther Leihang SDC leh Pu Obed Lalmalsawma SDC te'n an tawiawm a ni.