No.1020/2020-2020

Vawiin khan Champhai Bawrhsap Pu Mark Lalthanliana, SP Pu Rex Zarzoliana Vanchhawng leh Official dangte chuan Champhai district mi leh sa Mizoram pawna tangkhang lo hawte ni 14 chhung atana khunghranna tur hmun, Quarantine Centre hrang hrangte tlawhkualin an enfiah.  

Bawrhsap Pu Mark Lalthanliana leh Champhai district Official-te hian Tlangsam Polytechnic Building Quarantine Centre tlawhin inpuahchahna kal mekte enfiahin, Nodal Officer Champhai BDO Pi R. Lalnunkimi'n a lo dawngsawng a. He hmun hi mi 150 bawr vel khunghran theihna tur niin, a tul anga tihlen leh theih a ni. Inpuahchahna peihfel tep tawh niin, State danga tangkhang tam zawk an lo haw huna dah theihna tura chak taka hmalak zel a ni.

Heng bakah hian nimin lawka Quarantine Centre atana Bawrhsapin a ruat thar Tourist Lodge Champhai pawh tlawh a ni a, Nodal Officer Pu R. Lalhlimpuia, Asst Tourist Officer chuan Official-te hi lo dawngsawngin, Tourist Lodge Building hman mek bakah sak zawh hlim avaia mi 50 bawr vel len theihna turte enfiah a ni a. Cheibawl hna thawh mek kawngah Bawrhsap chuan a tul angte chak zawka buaipui turin thawktute a chah a ni.

Official-te hian Tlangsam Winery bula khualbuk Samuel's Inn mi 6 len theihna tlawhin Champhai Grape Growers Society hruaituten an lo dawngsawng a, hemi hnu hian Horticulture Rest House, New Champhai mi 6 len theihnate pawh tlawhin an enfiah leh a, SDHO Champhai Pu Vanlalvuana Rokhum chuan Officialte hi lo dawngsawng a ni. Chawhma lamah VANIS Building tlawha enfiah a ni bawk.

Quarantine Centre tlawhkualna hunah hian Bawrhsap Pu Mark Lalthanliana, SP Pu Rex Zarzoliana Vanchhawng, SDO Sadar Pu Lalnunfela Chawngthu leh DIPRO Dr. Lallawmkima te an tel a ni.

Champhai District-a cheng State pawna tangkhang mek haw tum in report hi vawiin May Ni 12, 2020 tlai dar 4:30 thleng hian mi 741 an  awm a ni. Tun dinhmunah Quarantine Centre pali awm mekin, khunghran mi 36 awmte DPRC Quarantine Centre, Keifangtlangah dahluh vek an ni. Tangkhang rawn haw turte dawl zo tur Quarantine Facilities tur ngaihtuah nghal zel a ni a, hetih lai hian rawn haw tur zat hi a danglam ve zel avangin district thuneitute chuan a tul angin ngaihtuahna an seng zel bawk  a ni.