No.3027/2020-2020

Dated Champhai, the 13th July, 2020: Mizoram khawchhak Tuipuiral tlang dung leh a chhehvel khuaa tunhnai lirnghing avanga rilru lama hlauhthawnna leh harsatna neite chanchin zirchianga an harsatnate sutkian anih theihna tura DM&R leh MZU tangkawp tirh, Psychological Support & Guidance Team-te chu vawiin chawhma khan Champhai Bawrhsap Pi Maria C.T Zuali chuan meeting a neihpui. He hun DC Conference Hall-a neihah hian rilru lam zirmi mithiamte thil hmuh dan tlangpui leh hmalak anih theih dan turte sawiho a ni.

Champhai Bawrhsap Pi Maria C.T Zuali chuan Champhai district chhunga lirnghing vanga thlabara rilru lama harsatna neite thlamuana thingtlang khaw hrang hrangte a tul anga tlawhkualtu Psychological Support & Guidance Team-te chungah lawmthu sawiin, an thil tih chuan mipuite chauh nilo Official-te thleng pawha chakna leh phurna a pek thu a sawi a. Mithiam tak tak te’n an zir thiamna a taka ngeia an hmang chhuak chuan rah tha tak a chhuah ngei a beisei thu leh zo khaw nunphung leh khawsak dan thlenga an tawnhriat chuan nasa taka a puih let a rin thu sawiin, zirchianna kaltlanga thil hmuhchhuah atanga hmalak ngai awm theite pawh chhinchhiaha a tul ang zela buaipui a ni ang, a ti a. Lirnghing leh chhiatrupna thlen thulha hmalak dan tur inzirtirna zau zawk kalpui tura ruahmanna siam anih thu leh In sak dan dik leh him bakah sakna hmunhma leh hmanraw tha zawk thlan kawnga inzirtirna kalpui tum anih thu tarlangin, rilru lama harsatna neite tana rawn theih turte ngaihtuah ani ang, a ti bawk. Psychological Support & Guidance Team-te kalzelna turah duhsakna hlanin mamawhtute tana inhawng renga tanpui thei tura awm reng thin turin a chah a ni.

Prof. Zokaitluangi, Psychological Support & Guidance Team Convener leh MZU-a Clinical Psychology Head of Department ni bawk chuan thil hmuhchuah leh zirbingna atanga an hriat tlangpuite sawifiahin, lirnghing vanga rilru lam tanpui ngaite tanpuina pe tura sawrkar tirh an nih thu a sawi a. July Ni 9,2020 atangin Team 7 a inthenin khaw 31 tlawhchhuah anih thu leh heng khuaahte hian Psychological Screening neiha, tul anga tanpuina pek thin anih thu a sawi a. Kawng chhia avanga Saikhumphai khua an tlawh thei lo chu pawi a tih thu sawiin, East Tuipui, Champhai South leh Hrangturzo biala tlawh tura ruahmnante an tlawh chhuah vek hman thu a sawi a. Harsatna neite a mal mala an kawm thin thu leh mi 105 an kawmte harsatna neih dan hrang hrangte tarlangin, a eng lam zawnga thil thlir thiam tur leh thuthang nazawng awih lo tura an fuih mai bakah inkaihhruainate an kawhhmuh thin thu a sawi a. Convener chuan Team aiawhin State sawrkar leh district administration-te programme ruahman tha tak avangin lawmthu a sawi a. Khawtlang hruaitu, YMA, NGO dangte leh hlauthawng leh thlabar chung chunga an hun buatsaih chhimtute chungah thinlung taka lawmthu sawiin, mamawh leh puih ngai an awm anih phawt chuan tanpui ngaite pui turin an inpeih reng thu a tarlang tel bawk.

Mizoram Sawrkara DM&R Department leh Department of Clinical Psychology, Mizoram University kaihhruainain Mizoram Psychological Association and Psychology Alumni Association of Mizoram University-a Psychologist leh Clinical Psychologist rualte chu Group 7 ah inthenin khaw 31; East Tuipui, Champhai South leh Hrangturzo Bial chhung Biate-a lirnghing avanga rilru lama harsatna neite leh hlauhna leh thlabarna neite puia Psychological diagnosis, Support & Guidance pe turin July ni 9,2020 khan Aizawl chhuahsanin an thawkchhuak tan a. A theih chenah chenah vantlang huap zirirna an pe a, a theih loh pawhin Village Information System kaltlangin zirtirna an pe thin a ni.

Meeting-ah hian Champhai DC Pi Maria C.T Zuali hi SP Pu Rex Zarzoliana Vanchhawng, Addl DC Pu Mark Lalthanliana, SDO Sadar Pu Lalnunfela Chawngthu leh DIPRO Dr. Lallawmkima te’n an tawiawm a ni.