4722/2025-2026

Champhai, dated 6th March 2026: Vawiin chawhnu dar 2 khan DC Conference Hall, Champhaiah Champhai Bawrhsap Pu Mohammad Aaquib chuan Mizoram Civil Service (Combined) Examination-a Champhai atanga tling pahnih, Lalhmingthanga, MIS a tling leh Zarzoliana, MPS a tling te chu kawmin lawmpuina thilpek a hlan.

Bawrhsap chuan he exam har tak paltlanga Mizoram sawrkara hna pawimawh tak an thawk thei tur hi ropui a tih thu sawiin an chhuanawm a tih thu a sawi a, Champhai leh Mizoram tana mi hman tlak leh mi rintlak tak ni turin duhsakna a hlan a ni. Bawrhsap hian lawmpuina thilpek leh plaque a hlan bawk a ni.

He hun zawhah hian sawrkar exam hrang hrang atan inzirtirna (coaching) kal mek, EAST Champs hnuaia zirlaite nen tling tharte hian inkawmna hun an hmang nghal a ni.