Vawiin khan Champhai District Anti Tobacco Squad leh District Level Task Force chuan an Chairman Champhai DC Pu H. Lalengmawia hovin DC Conference Hall-ah Joint Meeting an nei.

DC Pu H. Lalengmawia chuan vaihlo khuahkhirh kawngah Champhai District chuan hma an la tha hle a a hriat thu sawiin, hmasawnna tur erawh a la awm thu a tarlang a. Inzirtir taimak in rah tha a chhuah thin thu sawiin, hma latu hmasa an awm a pawimawh thu a sawi a. DC chuan taksa leh environment tha leh thianghlim kan buaipui rualin thinlung thianghlim neih a pawimawh thu leh, tunlai boruak duhawmlo tak hriat tur awm thin karah chhungkaw tinin nun uluk nachang kan hriat thar a pawimawh a tih thu a sawi bawk.

Vawiin meeting-ah hian Pi Vanlalmuanawmi, Champhai District Coordinator, Mizoram State Tobacco Control Society chuan Champhai chu Squad Drive thawk tha ber pawl a nih thu a sawi a. Champhai chu border state a nih avangin ram dang atanga zuk leh hmuam lo luh tamna a nih thu sawiin, heng zuk leh hmuam kawrah hian COTPA Dan, 2003 hnuaia Section 7-in a phalloh, vaihlo in hriselna a khawihchhiat theih dan tarlang lova hralh khapna dan chu a bawhchhiat thu a sawi a. Heng warning label tar loh hralhchhuak an awm chuan pawisa chawitir mai bakah lungin tan theih a nih avangin fimkhur a tul zia tarlan a ni.

Joint Meeting-ah hian Squad Drive neih chhunzawm zel dan tur te, Anti Tobacco Squad member list siamthat te leh COTPA hnuaia Section 7 chungchanga hmalak zel dan tur te sawiho a ni.