Vawiin chawhma khan Champhai DC Pu H.Lalengmawia chuan Champhai District chhunga Central organisation-te kawmin an hmalakna leh harsatna a sawipui. Addl. DC Pu Lalsawta leh Addl. SP Pu VL Lura Hauzel ten DC hi an tawiawm a. Central organisation atang hian Assam Rifles, SIB, BRFT, BSNL leh Customs aiawhte an tel a ni.
Champhai DC Pu Lalengmawia chuan District hmasawnna atan te, dan leh thupek kenkawh kawngah leh ram venhimnaah kalkhawmte chuan hna pawimawh tak an chelh thu sawiin, kalkhawmte chu thahnemngai taka an hna theuha hmasawnna awm tura thawhpuiah a sawm a. An hnathawhna kawng zawnah DC a nihna anga puihna tur a awm chuan pui tura a inhawn reng thu a tarlang tel bawk.
Vawiin thutkhawmah hian kalkhawmte chuan an hmalakna leh an harsatna tawh hrang hrangte an sawi a. Tun aia awmze nei zawka Zokhawthar Border Trade kalpui a nih theih dan tur te sawihovin, Myanmar lam kawng that loh avanga bungraw lut chu beisei aiin a tam lo thu te, dan anga bungraw lakluh kalpui a nih theih dan tur hrang hrangte bakah Zokhawthar hmuna inbiakpawhna lama harsatna te sawi lan a ni a. Hei bakah hian BRTF in kawng an siam hrang hranga harsatna an tawh te, BSNL phone hrui bo thin chungchangte leh ram dang atanga dan phal loh thil tawlhruk chungchangte sawiho a ni bawk.
