Vawiin chawhma khan Champhai DC Pu Vanlalngaihsaka kaihhruaiin NLUP Line Department pariat te nen meeting DC Conference Hall-ah neih a ni a. Kum 2014-2015 chhunga Department tinte hmalakna hrang hrang chipchiar taka sawiho niin, hmabak la awm te leh an thawh tawh china harsatna awm te sawi a ni.

Meeting kaihruaitu DC chuan NLUP chu Sorkarin Flagship programme a nih angin Sorkarin a ngaih pawimawh thu leh, chumi atan chuan a dawngtu mipui leh anmahni thlang a viltu VLNC-te leh tanpuina pe chhuaktu Line Department ten mawhphurhna an neih theuh thu a sawi a. Line Department hotute chu VLNC-te nen thawhhona tha tak nei chho zel tura chah in, Department mi te leh beneficiary-te kara awm, rawn tawn ber an nih avangin VLNC-te chu he policy hlawhtlinna atan mawh an phur sang hle nia a hriat thu a tarlang bawk.

Tunah hian Line Department tinah 3rd leh 4th Phase tanpuina hna kalpui mek a ni a. Champhai District chhungah hian AH& Vety hnuaiah beneficiaries an tam ber a. Champhai North leh Champhai South Cluster-te chu Piggery Trade bik atan Model Village-ah puan an ni. Fisheries hnuaiah NLUP Pilot Project - Paddy-cum-fish culture chu kalpuiin Champhai leilet zawl leh Khawzawl Tuisen phai a loneitu mi 519-te hnen a leilet buh hmuna chhuah tur sangha note (common carp) nuai 3.39 nikum khan semchhuah niin, loneituten an hlawkpui thu report a ni bawk. Beneficiary zingah hmalak that loh vang emaw, hmun danga pem vang emaw ten NIB phalna in tanpuina dawngtu thlak leh paih Forest Department hnuaiah mi pali an awm a (3rd leh 4th Phase), Industries hnuaiah chutiang mi chu 2nd Phase-ah khan beneficiary 20 an awm a, Horticulture Department hnuaiah hian 2nd Phase ah thawk thalo mi 26 an awm bawk. Beneficiary-te zingah Line Department-te report atangin thawk thalo leh hming pawh paih sak hial ngai an awm lain thawk tha tak tak leh regular income lakluh bakah an hlawkna atanga mamawhte lei belha eizawnna tilian te te sawi tur an awm thu ngaihthlak a ni.

Vawiin meeting-ah hian Addl. DC, District NLUP Nodal Officer, Line Department pariat-a hotute leh NLUP khawihtu bik staff-te leh DIPRO (District Media Officer, NLUP)-te an tel a ni.