Vawiin khan Champhai DC chuan a Pisa-ah Electoral Roll Final Publication a tlangzarhna a, he hunah hian Election Officer, ERO Champhai South, Political Party hrang hrang aiawhte leh Tlawmngai pawlte an tel a ni.

Champhai District chhung A/c 5 huama Final ER Publication neih takah hian voters 77,439 awmin, hetah hian mipa 38,536, leh hmeichhia 38,903 an awm a ni. 2012 Final ER voters aia a punna hi voters 3110 niin, 4.18% in a pung a ni. A/C 5 huamah hian Service vote 619 awmin Service Voters nen apumpuiah voters 78,058 an awm dawn ta a ni.Form 6 hmanga diltu mi 6,802 zinga dilna 5,162 chu pawm niin, mi 640 dilna chu hnawl a ni thung. ER a thunthar mi 3,110 te EPIC hi siam peihfel nghal vek niin, kumin January 25, National Voters’ Day hun hman ni-ah semchhuah anih tur thu leh Champhai District bikah hian Epic 100% (za a za) neih anih thu DEO hnen atangin dawn a ni bawk.

Champhai District chhung A/C 5 huam chhung Final ER Publication a voters awmdan chu hetiang hi a ni: 21- Lengteng 16,124, 22-Tuichang 14,953, 23- Champhai North 16,844, 24- Champhai South 15,628, 25-East Tuipui 13,890 a ni a, A/C 5 zingah hian 24 Champhai North-ah voters tam berin 16,844 an awm a, voters pun tamna ber ni bawkin, mi 797 (4.97%) thun thar an ni.