No.2945/2021-2022

Aizawl 11th November, 2021: National Hydrology Project (NHP) kaltlanga leihnuaia tui awm dan leh verhchhuah chungchang inzirtirna, 'Hydrogeological and Physical Survey, its implications on groundwater investigation' tih thupui hmanga training, Irrigation & Water Resources Department hmalaknaa buatsaih chu tukin dar 7:30 khan Champhai District Bawrhsap Pi Maria C.T Zuali chuan Champhai leilet Thingmaldin M.I Project hmunah a hawng.

Champhai District Bawrhsap Pi Maria C.T Zuali chuan National Hydrology Project kaltlanga mithiamte kaihhruai leiverh chungchang zirchianna Champhai leilet zawla kalpui a ni tur chu lawmawm a tih thu a sawi a. Ei leh in, nitin mamawh thartu loneitute chu indah hniam mai lova inring tawk taka awm tur leh, hmasawn duhna leh intuaithar reng duhna nei turin a fuih a. Mahni duh dan anga kal mai lova mithiamte rawn chunga hma la thiam turin a chah a. Leihnuaia tui awmin lei pawnlang awm dan leh nihphung thui tak a hril thu sawiin, leihnuai tui tlingte a kiam zel chuan lei a charin a ro phah hle thei a, nakin lawka harsatna kan tawh loh nan duhna lai laia leiverh ngawt hi kan bansan a tul a ni, a ti bawk.

Bawrhsap chuan loneitute chu buhseng zawha thlasik thlai chin theih 12 awmte ching uar deuh deuh turin a fuih a. Mihring tha chu a tlem avangin khawl hmanga thawk tura insiamrem chhoh zel a ngaih thu leh hamthatna dawng turin cooperative society mumal tak din zel a tul thu sawiin, loneitute chu watershed development fund dahna tur bank account hranpa siam tur leh tuilakna kawng leh tul dangte enkawl zui nana hmang thin turin a chah a. Sawkar-in hmanrua leh bungrua a siam leh dah sakte chu neitu thinlung pu chunga hmanga, a enkawlzui kawngah pawh sawrkar pur kher lovin mahni leh pawl intodelh tum turin a fuih bawk a ni.

Department hotu leh mithiam zirnain tha tak tak atanga degree sang tak tak neite chu zirlaibu leh a taka thil awm dan a dang daih thu hrilhin, mahni awmhmun atanga thawh ngawt nen a inangloh a avangin loneitute puih duhna leh hriatthiamna tak tak neia thawk chhuak thin turin a chah bawk a. Zau hrang hrang intelkhawm loneitute chu mimal hamthatnate dah bova pawl anga lungrual taka thawkho thin tura chahin, training hlawkthlak tak hman a nih theih nana duhsakna hlanin a hawng a ni.

Thusawitu dang Resource person Pu Tapash Saraswati, Senior Consultant (Hydrogeologist) chuan leihnuaia tui tling chu zo mai thei a nih avangin a pawng a taka leiverh loin lei pawnlanga tui awmte tangkai taka hman hnuah indaihlohnate a awm a nih chuan renchem tak chunga hman chauh tur a nih thu sawiin, leihnuai tui awm chu tling khawm leh hman thei tura hun peka awltir chang neih a tul thu a sawi a. Duh duhna laia leiverh ngawt chuan nghawng thalo zawk a thlen theih avangin fimkhur taka mithiamte rawn chunga leiverh a tul thu sawi a. Tlangram Mizoramah leilung chanchin hriatfiah mai a har avangin zirchian hmasak a tul thu leh, tubewell design tha tak neih angaih thu a sawi a. A tlangpuiin leihnuai tui awm verhchhuahte hman dan tur bituk pela hman a nih thin avangin mamawh ang tawk chauha hman a nih theih nan fimkhur taka kalpui a tul thu a sawi bawk.

Training hawnna hun hi Er. Laldingliana Hrahsel, Executive Engineer, IWRD Champhai Division chuan a kaihhruai a. Pi Lalremtluangi, Geologist, Chief Engineer Office-in technical report a pe a. Pu B. Lalzarzova, Divisional Horticulture Officer (DHO), Champhai District-in thu a sawi bawk.

Leihnuaia tui tling zirchian hmasak leh verchhuah chungchang training hi theory-in November ni 8, 2021 atang khan neih tan a ni a. Hmalakna hmasa tur pilot site a thlan Champhaiah hian vawiin November ni 11, 2021 atangin Sr. Consultant (Hydrogeologist) hovin a taka tihchhinna (practical) hmangin survey neih tan a ni a, hlawhtling taka leihnuai tui hmuh/ lakchhuah a nih theih nan zirchianna leh ruahmanna felfai tak nena survey kalpui tura hmalakna siam a ni.

Thingmaldin zau chhunga leihnuai tui verhchhuahna tura hmun ruat 16 awmte chu Resistivity meter hmangin Geophysical survey neih hmasak a ni ang a, result a that chuan leiverh leh tul dangte a tahtawla buaipui leh tur a ni ang.

Training hawnna hunah hian Pu B. Lalhmuchhuaka DAO, Dr.Lallawmkima DIPRO, IWRD hnuai thawktu CEO Office Aizawl, Khawzawl leh Champhai amite bakah Thingmaldin zau leh Zote Tiau zau a leilet neitute an tel a ni.