No.3371/2021-2022 

Aizawl, the 12th December, 2021: Fostering Climate Resilient Upland Farming System in the Northeast (FOCUS) project kaltlanga A.H & Vety. Department, Champhai District-in FOCUS Project ‘Mithun Shelter-Community Level and Water Supply Facility for Grazing Area’ tih kaltlanga Sial in leh tuikhur ramhnuaia siamte chu nimin chawhnu khan Champhai District Bawrhsap Pi Maria C.T Zuali chuan hman theih turin a hawng.

Bawrhsap Pi Maria C.T. Zuali chuan Sial chu pipute hunlai ata tawh Mizote nuna bet tlat a nih avangin hlutna chang kan hriat deuh deuh angai a ni, a ti a. Mizoramah Champhai District leh khawchhak lamah Sial vulh an tam thu sawiin, khawchhak tlangdung hmingthanna Sial chu tam lehzuala vulha a lo ropui zual deuh deuhna tura tanla turin Sial vulhtute a sawm a. Tunlai thiamna nen tangkawpa hmasawn leh hlawk zawka Sial vulh a nih theih nana tanlak tulna hrang hrangte tarlangin, a sa chauh nilo a ek leh a dangte tangkai zawka hman zir a ngai a ni, a ti bawk a. AH&Vety Department leh North Khawbung khuaa Sial vulhtute thahnemngaihna kaltlanga Sial vulh kawnga hmasawnna ruhrel duhawm tak siam chu tangkai taka hman a nih theihna tura duhsakna hlanin a hawng a ni.

He hun kaihruaitu Dr. B.Zonghinga, DVO Champhai chuan Sial vulh chu eizawnna tlak a nih thu leh Mizote thinlungah a beh tlat avangin hralhna kawngah harsatna a awm loh thu a sawi bawk.

Sial in leh tuipekna 'Mithun Shelter Community Level and Water Supply Facility for Grazing Area' tih project hi FOCUS hnuaia thawh niin sawrkar kum kalta khan DVO Champhai huam chin Champhai District chhunga khaw 8; Farkawn, Samthang, Vangchhia, Sazep, Lianpui, Khuangleng, Hnahlan leh Tualchengte bakah, Khawzawl District-a Vangtlang leh Saitual District-a Kawlbemahte hawn a lo ni tawh a. Tunah hian Champhai District-a khaw 5; North Khawbung, Khuangphah, Vapar, Ruantlang leh Vaphaiahte Sial in leh tuikhur hi siam niin a hmasa ber atan North Khawbung hi Inrinni December ni 11, 2021  chawhnu khan hawn a ni a, khaw dang 4 a siamte pawh hawn mai theih tura peih vek tawh an ni bawk.

A.H & Vety. Department Champhai chhinchhiah danin  North Khawbungah hian Sial vulh chhungkua 21 awmin Sial 92 an vulh mek a ni.a