3052/2023-2024

Champhai the 15th December, 2023 - Vawiin chawhma khan Champhai DC & Chairman District Disaster Management Authority, Pu James Lalrinchhana chuan chhiatna lo thlen thulha chhanchhuahna hmanrua chi hrang hrang te Sub Hqrs YMA, Champhai hruaitute hnenah a hlan a ni.

Champhai DC & Chairman District Disaster Management Authority (DDMA), Pu James Lalrinchhana chuan Sub Hqrs YMA Champhai leh Branch YMA hrang hrang te chu khawtlang himna leh muanna venhim hna an thawh te, ruihhlo do kawnga an hmalaknate, chhiatna thlena chhanchhuahna hna an thawh kawngah te khawtlang tana an inpekna a hlu takzet a ni tiin, kawng hrang hranga thawhho pui leh hmalak pui chhunzawm zelah a sawm a. Champhai District chu khuarel chhiatna, a bik takin lirnghing tamna hmun anih avangin hmanraw neih belh kawngah te leh DM&R training buatsaih kawngah te DDMA chuan theihtawp chhuah chhunzawm zel a tum thi pawh sawiin, YMA te chu an hmanraw mamawhte inthlahrung lova thlen thin turin a sawm a ni.

Hlanna inkhawm hi Champhai DC Office tualzawl, Keifangtlang ah neih niin Champhai Addl DC Pu M. Misael in a kaihruai a. Sub Hqrs YMA, Champhai te hnenah hian Folding ladder pakhat, 10mm Rope (50 metres) pahnih, search light pahnih, head light paruk, leh surgical glove box khat hlan an ni.