3005/2023-2024

Champhai, the 11th December, 2023: Champhai District Bawrhsap Pu James Lalrinchhana chuan vawiin khan Vanzau, Zawngtetui leh Bungzung khua te a tlawh a, khawtlang hruaitute leh tlawmngai pawl hrang hrang aiawhte kawmin hmunhma pawimawh hrang hrangte a tlawh a, khawtlang mamawhte a hlan nghal bawk.

Pu James Lalrinchhana chuan khawtlang mamawh angte a hmuna enfiaha zirchian a pawimawh thu leh khawtlang hruaitute nena sawihoin awmzia thui tak a neih theih thu a sawi a. Khawtlang hruaitute chu rualelna dik nei chunga tan la turte, tun hun mai nilo hmathlir thui tak neia khawtlang mamawh leh tulte ngaihtuah thin turtein a chah a ni.

District Bawrhsap chuan khawtlang hruaitute chu zirna dah pawimawh hmasa ber tura chahin, faina atanga intan hriselna ngaipawimawh turte, ramngaw leh nungcha humhalh kawnga tan la zel turte, ruihhlo laka thalaite fihlim theih nan sports hmanga chona siam tum tur tein a chah a. Nakin lawka ram leh hnam innghahna ni mai tur thalaite khawvel hmabak eng tak siam tura tanho a pawimawh thu sawiin khawvel changkang chho zel ina a ken tel information technology lama hmasawnna hrang hrangte an inzir ve zel theihnan school zirtirtute leh khawtlang hruaitute chu theihtawp lo chhuah tlang turin a chah a. Khawtlang inrelbawlna kawnga mi pawimawh tak takte chu khawtlang hamthatna haichhuah leh inrelbawlna tha taka kalpui thei tura dan leh hraite ngaipawimawha zirchiang thin tura fuihin mamawh an neihte leh rawtna an thlen duhte inthlahrung lova District Administration a thlen thuai thin turin a chah in a sawm a ni.

Champhai District Bawrhsap Pu James Lalrinchhana hian Vanzau, Zawngtetui leh Bungzung khua leh a chhehvela hmunhma pawimawh tak tak Health Sub-Centre, Govt. Primary, Middle leh High School, Anganwadi, infiamna hmunhma, Community Hall, YMA Hall leh inkalpawhna kawngte a tlawh a. Mamawh leh tul angte khawtlang hruaitu VC member leh NGO hotute a sawipui a, mamawh an thlente tihpuitlin a nih theih nan theihtawp chhuahpui a tum thu a sawi bawk.