Champhai DC Pu H. Lalengmawia'n Champhai District chhunga Village Council Final Electoral Roll 2015 chu vawiin khan DC Conference Hall-ah a tlangzarh.

Champhai DC leh DEO Pu H. Lalengmawia chuan Champhai District chhung A/c 5 huama Village Council Final Electoral Roll, a thlalak nen chuang kawpa peih a ni ta chu lawmawm a tih thu leh Final Roll tlangzarh theihna tura thawktu zawng zawng, Election Branch a thawktute, Political Party-te, tlawmngai pawl hrang hrangte leh khawtlang mipui inpekna-ah lawmthu a sawi a. Ram mipui dinhmun tarlanna (Statistic) dik tak neih chu thil pawimawh tak anih thu sawiin, Pu H. Lalengmawia chuan India ram thanmawh bawk pakhat chu dinhmun dik tarlanna (Statistic) dik tak a neih loh vang ni a a hriat thu a sawi a. Electoral Roll dik nei turin Statistic dik tak neih chu a pawimawh thu a sawi bawk.

Tlangzarh tak VC Final ER-ah hian Champhai District chhung A/C 5-ah Voters 79,415 awmin, mipa 38,530 leh hmeichhia 39,885 an awm a. Khaw 108 awmin chhungkua 24,136 an awm a, 2012 ah VC member 439 awmin, 2015 atangin VC member 468 an awm thung a, Serchhip District a awm thin Vanchengpui khua chu 21 Lengteng (Champhai District)ah a awm tawh dawn a, hetih rualin Champhai District (22 Tuichang A/C) a awm thin Biate chu Serchhip District chhungah a awm ve thung dawn a ni.

Champhai District huam chhung Assembly Constituencies 5, 21- Lengteng khaw 20 awmin, chhungkua 4,492 Vote nei thei 16,381 an awm a, 22-Tuichang ah khaw 22 awmin, chhungkua 4,622 an awm a, vote nei thei mi 15,251 an awm a. 23-Champhai North-ah khaw 23 awmin, chhungkua 4,963 an awm a, vote nei thei mi 17,421 an awm a, 24 - Champhai South-ah khaw 18 awmin, chhungkua 5,178 an awm a, vote nei thei mi 16,145 an awm a. 25- East Tuipui-ah khaw 25 awmin, chhungkua 4,881 an awm a, vote nei thei mi 14,217 an awm bawk.

Champhai District chhunga khaw 13 a Village Council member zat tih danglam a ni dawn a, khaw 12 a Village Council member tihpun anih laiin Sialhawk khua erawh chu VC member 7 atangin member 5 ah an tla thla thung dawn a ni.

Vawiin VC Electoral Roll tlangzarhna hunah hian Political party hrang hrang aiawh te bakah Election buaipui tute leh Media mite an tel a ni.