No.2194/2020-2020

Dated Champhai, the 19th June, 2020: Vawiin khan Champhai District Bawrhsap thar Pi Maria C.T Zuali, MCS chuan MJA Champhai District Member-te chu a Pisa-a lengah sawmin, inhmelhriattirna leh inkawmna hun a hmanpui. MJA Member-te hi President Pu Lalhmingmawia Pachuau-in a hova, Champhai district hmasawnna tura hmalakna hrang hrangte leh hmachhawpte Bawrhsap hi an sawipui a ni.

Pi Maria C.T Zuali chuan Champhai district chu district nuam leh mawi tak, sik leh sa nuam, a mi chengte pawh Mizona thilung pu a vawnghim tlattute ni a a hriat thu a sawi a. Bawrhsap hna a chelh atangin Champhai district Media-te kawm a rilruk thu leh hmun kilkhawr bera chengte thlengpha tura Sawrkar Scheme leh hnathawhte a zau thei ang bera puanzar a pawimawh thu a sawi a. Sawrkarin scheme leh programme thar a kalpui tur reng rengah mipuite rilru sukthlek siam rem hmasak phawt a tul a, hemi tur hian Print leh Electronic Media kaltlanga zirtirna pek hmasak a tangkai a ni, a ti a. Chanchinbumite chu Sawrkar Scheme puanzar kawnga a kila lung tangkai tak an ni tiin, ram leh hnam rawngbawl hna thawka inpekna thinlung putute chu chhuanawm a tih thu a sawi a ni.

Bawrhsap chuan zirna kawnga hmasawnna, dikna leh rinawmna hmanga eizawnna ngelnghet din thei tura tan lak angaih thu leh hmeichhiate dinhmun chawikan Women Empowerment lama tanlak angaih thu pawh sawiin, Women Empowerment chu hmeichiate chungnung thur thurna leh mipate atanga thuneihna lak then ai mahin dinhmun sawhngheha chawikan lam a kawh zawk thu a sawi a. Chanchinbumite chu anmahni kaltlanga thu leh hla puan ten mipuite rilru sukthlek chena a thlak theih avangin fimkhura, dikna, huaisenna leh rinawmna nena hna thawk fo thin turin a chah a. MJA Member-te chu Champhai district hmasawnna leh kalzelna tur kawnga thawhhopuiah sawmin, thurawn leh infinchhuah angaih hunah pawh inthlahrung hauh lova a hnena thlen zel thin turin a sawm nghal a ni.

Champhai district Deputy Commissioner thar chuan MJA member-te atanga Champhai district hmasawnna kawnga tul leh hmabak awmte, district tana kalphung tha zawk tur ni a hriat thlente chu ngaihthlak sakin, mamawh leh rawtna thlente chu lo zirchianga a tul ang zela bawhzui anih tur thu a sawi a ni.

He hunah hian Bawrhsap tawiawmtu Dr.Lallawmkima, DIPRO Chanmphai chuan Champhai district chhunga Media kaltlanga hnathawh hrang hrangte tarlangin, Chanchinbumiten sawrkar tha taka an tawiawm thin thu leh thawhhona tha tak an neih thu a sawi a ni.

Champhai District MJA President Pu Lalhmingmawia Pachuau chuan pawl member-te hmelhriattirna neiin, Champhai Bawrhsap thar lakah district mipuiten beiseina sang tak an neih thu leh a awm chhunga Champhai district tana thil hriatreng tlak hnutchhiah tum turin MJA Champhai district in an beisei thu a hrilh a. Champhai district tih hmasawn leh changtlung kawngah theihtawp chhuaha tawiawm tlat an tum thu a sawi bawk a ni.

MJA Champhai district hi kum 1972 ah Champhai Journalist Association (CHJA) ti a din a ni a, kum 2006 khan Mizoram Journalist Association zawmin, MJA Champhai District tih a lo ni ta a ni. Tun dinhmunah member 14 an awm mek a ni.