2587/2023-2024

Champhai the 1st November, 2023 - Vawiin khan Champhai DC & District Election Officer Pu James Lalrinchhana kaihhruaiin 25 East Tuipui Assembly Constituency huamchhunga Polling Station pakua (9) ah inspection neih a ni.

Polling Station Inspection ah hian Champhai SP Pu Vineet Kumar leh DIPRO Pi C.Lalremruati leh election thawktu dangte telin Polling Station tinah a bialtu BLO ten an tawiawm a ni.

Vawiin inspection ah hian inthlan hlawhtling taka neih anih theihna tura Polling Station te inpuahchahna hrang hrang uluk taka en ho niin, Election Commission of India (ECI) ina Polling Station tina awm ngei tura a bituk te - electric supply, tui in tur thianghlim, inthiarna, pianphunga rualbanlote hman tur ramp, leh furniture mamawhte a awm ngei em tih te leh venhimna chungchanga ruahmanna awmte (security arrangement) enfiah a ni a. Champhai DC & DEO Pu James Lalrinchhana chuan inthlan hmachhawn tura inpuahchahna kawngah mipuite hamthatna leh an tana awlsam zawkna a theih ang anga siam sak a tul thu sawiin, inthlan ni ah voter te in tlar tawt lutuk emaw in nek buai te a awmloh na turin BLO-te chu ruahmanna an neih te uluk leh felfai taka lo kalpui turin a chah a. Harsatna leh mamawh an neihte pawh District administration ah thlen vat turin a chah bawk a ni.

Vawiin inspection-ah hian Farkawn I PS, Farkawn II PS, Thekte PS, Thekpui PS, Khankawn PS, Vaphai I, II, III PS leh Samthang PS te tlawh an ni a. Thekpui PS leh Thekte Polling Station te hi Despatch/Receiving Centre, DC Office Keifangtlang atanga Polling Station hla berte niin km 119, darkar 5 tlan ni a chhut an ni.

MLA Election, 2023 atan hian Champhai District ah ruahmanna felfai tak siam a ni a. District pum chu Sector 12 ah then niin 23-Champhai North ah Sector pali (4), 24-Champhai South ah Sector pathum (3) leh 25-East Tuipui ah Sector panga (5) a awm a. Heng sector-ah te hian Sector Officer leh Sector Police Officer pakhat ve ve duty in, Anmahni sector chan theuhah inthlan tluang leh felfai taka kalpui anih theihnan ruahmanna mumal tak – Sector Management Plan an siam fel tawh a. An bial chhungah VCP, beat constable leh sawrkar official awmte nen tangrualin an sector ah theuh hma la in, Polling station map leh voter tana facility awm te, inkalpawhna kawng dinhmun, mobile leh internet connectivity dinhmunte leh Model Code of Conduct bawhchhiatnate a awm em tih uluk takin an vil mek a. Polling Station panna kawng tha tawklo te chu PWD in repair hna thawk chho mek zelin, Champhai District huamchhungah mobile signal awm miahlohna hmun shadow area a awmlo a ni.

Inthlan ni a duty tur polling official te tan training tum hnih neih tawh niin, training tawp berna chu November ni 4 (Inrinni) ah neih tum a ni.

Champhai District Final Electoral Roll, 2023 in a tarlan danin Champhai District ah Voter mi 57,180 an awm a, an zinga mi 27,880 te hi mipa niin, hmeichhe voter 29,300 an awm a. Polling Station hi a zavaiin 84 awmin, 23-Champhai North ah 30, 24-Champhai South ah 25 leh 25-East Tuipui ah 29 a awm a ni.