2233/2023-2024

Champhai the 9th October, 2023 – Vawiin chhun dar 12 ah Election Commission of India-in General Election to the Mizoram Legislative Assembly 2023 schedule an puan hnua hmalak nghal tul te ngaihtuah hovin vawiin khan Champhai DC &DEO Pu James Lalrinchhana kaihhruaiin DC Conference Hall, Keifangtlang-ah meeting neih a ni.

Meeting-ah hian Champhai SP Pu Lalrinpuia Varte; Addl DC & Returning Officer 23 Champhai North AC Pu M. Misael; PD,DRDO & Returning Officer 25 East Tuipui AC Pu Lalrinawma; Champhai Election Officer Pu Benjamin Zalawm Ralte leh Nodal Officer thenkhat an tel a ni.

Champhai DC & DEO Pu James Lalrinchhana chuan ECI in election schedule a rawn puan tawh angin election kaihhnawih bawhzui nghal zung zung ngaite a awm thu sawiin, vawiin khan Order tul angte tih chhuah nghal anih thu a sawi a. Official kalkhawmte chu inthlan hmachhawn tura mawhphurhna fawng chelhtute an nih angin an inpuahchahna felfai taka kalpui a, a tul apiang chak taka an bawhzui chhoh a tul thu a sawi a. Election kaihhnawihah emergency-a in koh thut thut te a awm thin dawn avangin officials-te chu hetiang tura lo inbuatsaih leh insiamrem turin a chah bawk a ni.

Election kaihhnawiha Champhai District-a Dan leh Thupek kenkawh kawnga hmalakna kal mekte chu thlir ho a ni a. Champhai SP Pu Lalrinpuia Varte chuan report pe in election vuakveta venhimna thawk turin sawrkarin Champhaiah CAPF company pali (4) rawn dah a tum thu a sawi a. Heng te hi an chenna hmun turte ruahman chhoh mek niin, Polytechnic Tlangsam; District Panchayat Resource Centre (DPRC), Keifangtlang; Farkawn; Zokhawthar Commerce & Industries hmunhma; Hnahlan; leh Dungtlang-ah te a ni a. Heng hmunah te hian repair leh hnathawh ngai te tan nghal tura hmalak dan tur sawiho a ni a.

Election vuakveta sila tun chungchang pawh sawiho niin Champhai District-ah silai register 1123 a awm thu report a ni a. Heng silaite thehluh dan tur leh dah him dan tur chungchangte pawh rel fel a ni a. Model Code of Conduct kenkawh kawnga duty tur Flying Squad-te pawh an che chhuak nghal dawn a ni.

Champhai District Final Electoral Roll, 2023 chu October ni 4, 2023 khan tlangzarh a ni a. Roll in a tarlan danin Champhai District ah Voter mi 57,180 an awm a, an zinga mi 27,880 te hi mipa niin, hmeichhe voter 29,300 an awm a ni.