1831/2022-2023
Champhai, the 5th September, 2022: Naktuk September ni 6, 2022 a Champhai Dinthar Veng VC By-Election neihna tura inpuahchahna chu vawiin khan zawhfel niin, Dinthar VC by-election neih tur atan engkim peihfel a ni.

Returning Officer, Presiding Officer leh Security personnel-te tana training hnuhnung chu vawiin chawhnu dar 2 khan neih niin, inthlanna tur hmunhma Govt. Kanan Middle School chu Assistant District Election Officer Pu Lalnunfela Chawngthu; AERO & Master Trainer Pi Esther Leihang, SDC; Polling Official; Security Personnel leh Political Party aiawhte chuan vawiin chawhnu khan tlawhin an enfiah a. By-election neihna tura duty tur polling official leh security personnel-te chuan zanin hian polling station hi an riahchilh nghal dawn a ni.

Inthlan campaign hi nimin tlai dar 5 khan a tawp tawh a, hemi hnu hi chuan eng campaign mah phal a ni tawh lo a ni. Political party tin ten polling agent leh counting agent pawh an inruat fel tawh a. Dinthar VC by-election seat ruak 1 atan hian chuhtu hming pe lut mi 3; INC, MNF leh ZPM candidate-te an awm a. Naktuk zing dar 7 atang hian vote thlak tan a ni dawn a, tlai dar 5 thleng hun hawn a ni ang a, hemi hnu hian polling station-ah vek hian vote chhiar nghal tur a ni a. Executive Body siamna hun tawp ber atan September ni 9, 2022 ruat niin inthlan kaihhnawih zawhfel a ni ang.

August ni 8, 2022 a Champhai Dinthar Veng final electoral roll tlangzarh takin a tarlan dan chuan Champhai Dinthar Vengah hian vote nei mi 652 an awm a; heng zinga 292 hi mipa niin, a dang 360 te chu hmeichhia an ni a, hmeichhe vote nei hi 68 in an tam zawk a ni.

Champhai Dinthar Vengah hian VC seat 5; General seat 4 leh Reserved seat 1 a awm a. VC member 1, General seat atanga tling a ban tak avangin he seat bik hnawhkhat tur hian inthlan buatsaih tur a ni.