1442/2023-2024

Champhai the 10th August, 2023 - Naupang kum 1 atanga 19 inkarten rulhut an pai lohna tura rulhut hlo pek beihpui leh rulhutin a nghawng thalote inzirtirna hun, National Deworming Day (NDD), 2023 hawnna chu vawiin khan Champhai District Level Coordination Committee on National Deworming Day (NDD) Chairman Pu James Lalrinchhana hovin GM High School ah neih a ni.

National Deworming Day (NDD), 2023 thawhhnihna hi vawiin August ni 10 atangin August ni 17 thleng neih tur a ni a. Hemi hun chhung hian District chhunga zirna in hrang hrangah rulhut hlo Albendazole tablet a huhovin ei a ni dawn a, zirna ina in enrol lo te chu ASHA-ten an inah kal chilhin an pe dawn a. Undivided Champhai District tana target hi naupang 52,610 an ni.

National Deworming Day (NDD), 2023 hawnna program Champhai CMO Dr PC Lalhmingliana kaihhruaiah District Bawrhsap Pu James Lalrinchhana chuan rulhut hlo ei beihpui thlakna National Deworming Day chu District mipuite hriselna atana hun pawimawh tak anih thu sawiin National Deworming Day (NDD), 2023 thawhhnihna hman chhungin District naupangten rulhut hlo an ei vek theihnan nu leh pa te, zirtirtute leh Line Department-te theihtawp chhuah turin a chah a ni. Zirlaite chu an thiamna leh theihna te an hman tangkai theihnan an taksa leh rilru hriselna enkawl tha tura chahin an thil zirte pawh by heart mai lova hriatthiam tak tak na neih tum zel turin a fuih a ni.

Dr Krossnunpuii, Microbiologist, District Hospital Champhai hnen atangin Powerpoint Presentation hmangin rulhut pai ina hriselna a nghwng theih dan te leh rulhut laka kan him theih dan tur hrang hrang zirtirna ngaihthlak a ni bawk.

National Deworming Week hawnna hunah hian Champhai District Bawrhsap Pu James Lalrinchhana leh Official dangten naupangte hnenah rulhut damdawi hi an ei tir nghal bawk a ni.

National Deworming Day (NDD) hi India ramah kum 2015 ah khan State/UT 11 ah bul tan a ni a, a hlawknate hmuh a nih hnuin India ram pumah February 2016 atang khan hman chhunzawm a lo ni ta a ni. He hmalakna hi rulhut pai vanga natna hrang hrang thleng theite, thisen tlakchhamnate leh naupang thanthu umbo nan a ni a, kum 1 – 19 inkarte tan kumtin vawihnih (2) rampum huapin a rual a rulhut hlo eitirna tur hun hi kalpui a lo ni ta a ni. Mizoram ah pawh February 2016 ah hman tan a ni.

Rulhut pai hian hriselna lama harsatna hrang hrang - Thisen tlakchhamna, taksa tana chaw tha tlakchhamna, chaw ei tui lohna, chauh leh hlauhthawnna, pumna, luak chhuak, kawthalo te thlen thei a. Naupangte rulhut laka anlo fihlim ngei theihnan NDD 2023 hi ngai pawimawh a, kan fa te rulhut hlo ei tir ve ngei turin Champhai District Level Coordination Committe on NDD chuan District mipuite a sawmin a ngen a ni.