No.4524/2020-2021

Dated Champhai, the 28th August, 2020: Village Councils Election 2020 puala Champhai district-a vote thlak August Ni 27, 2020 zing dar 7 atanga neih tan chu boruak ralmuang leh muanawm tak hnuaiah zan dar 8:55 vel khan zawhfel theih niin, vote chhiar chhunzawm nghal a ni a, vote chhiar hi tukin August Ni 28, 2020 zing dar 4:30 vel bawr khan zawh fel hman a ni.

Nimin vote thlak ni August Ni 27, 2020 chhun dar 12 thleng khan vote za zela 33.36 tlain, vote thlak zawh anih hnua chhinchhiah anih danin kumin VC inthlana Champhai district a vote tla zat chu za zela 75.03 a ni. N.Khawbung Polling Station-ah Vote tla tha berin za zela 91.10 a tla a, vote za zela 65.53 tlakna Electric Veng Polling Station-ah vote tla percentage a hniam ber a ni. Vote za zela 80 chin chunglam tlakna Polling Station 20 a awm a ni.

VC Election hi State Election Commission in endik tura a ruat Pi Zosangzuali Pachuau, Election Observer leh Pi Maria C.T Zuali, District Election Officer-te chuan Polling Station hrang hrangte tlawhin an enfiah a. Sector Officer, Police Zonal Officer, Quick Response Team, Polling Official-ten inthlanna felfai leh muanawm tak neih anih theihna turin theihtawp an chhuah mai bakah Mizoram People Forum leh YMA member ten inthlanna buaipuitute tha takin an tawiawm bawk a. District chhunga Polling Station tinah hian State Election Commission thu angin, tunlai hrileng avangin vote thlakna hmunah hian hmaituamna, Social distancing-te ngaihpawimawh niin, hand sanitizer-te chhawp vek a ni.