No.2731/2020-2020

Vawiin chawhnu khan Champhaia COVID-19 natna kai mi pathumte chuan  dam takin enkawlna hmun,  Recovery Ward, Dedicated Covid Health Centre (DCHC) an chhuahsan. ‪Damlo pathum chhuaktate hi mipa vek niin, Delhi atanga lo hawte an ni.  

An puala thlahna hun DCHC Nursing School Building Ground Floor-a buatsaih hi Dr. J.Lalramchhuanga, Leader, Treatment Team & Nodal Officer, DCHC chuan kaihruaiin, Medical Team-te theihtawp chhuah   leh  mipuite tawngtaisaka thlawpna avang chauha damna  lo awm anih thu a sawi a. Dedicated Covid Health Centre-ah hrikaite an enkawl thin thu leh tuna chhuaktate pawh enkawl an nih laia insawiselna tlem an neih ve deuh thu a sawi a. Enkawlna hmun dama chhuahsan turte chu ni 7 chhung  inlama tawmim riha, mahni hriselnate ngun taka ngaihvena, harsatna an neih pawha bikpawh theihna tur an pekte be pawp vat thin tura chahin, an chinchang Medical Team te'n an ngaihven chhunzawm zel dawn ani, a ti bawk.

DCHC luh atanga ni riatnaah Covid-19 an negative   thusawiin, damlote thla khat dawn riahchilha enkawltu Isolation Team-te chu chhuanawm a tih thu sawiin,  ei leh in,  mamawh dangte duhsak taka petu mipuite chungah thinlung takin lawmthu a sawi a. Dr. J.Lalramchhuanga chuan ei leh bar zawnna tibuai lova fimkhur tak chung zela natna kaidarh tur ven kawnga khawsak thiam a tul thu pawh sawiin, Covid-19 hripui chu  mipuia a len loh nan hmaituamna vuah, kut silfai ngun leh Social distancing te tha taka zawm zel angai ani, a ti bawk. 

He hun hmanpuitu Dr. Lallawmkima, DIPRO Champhai pawhin thusawiin, Champhai district-ah thawhhona tha tak hnuaia Covid-19 buaipui ani, a ti a. Tun thlenga hmunpui zawk pan ngai lova natna kaite district chhung ngeia enkawl an ni leh rang taka an dam thin chu Pathianin  Treatment Team te inpekna leh mipuite tawngtai a chhanna anih thu a sawi a. Damna changte a lawmpui rualin, damlo enkawl mekte pawh dam thuai tura a duhsak thu a sawi bawk.

Dr. Lalnuntluanga, DCHC riahchilh mektu Isolation Team Leader  chuan damlo chungchang report pein, tuna chhuak turte chu chhuah vawi 3 na tur niin, chhuak tawh zawng zawng mi 8 anmahni tiamin anih thu leh 2 dang enkawl mek an nih thu a sawi a. Tuna damtate chu June Ni 13, 2020 a Throat Swab sample lak, June Ni 20, 2020 result chhuaka Covid-19 positive tih hriat hnua DCHC a dahluh nghalte an nih thu sawiin, June Ni 28, 2020 a sample lak nawn leh result June Ni 30, 2020 chhuaka negative vek te an ni, a ti a. Damlo enkawla riaklut Isolation Team member-te chu mi 5 niin, ni 27 chhung June Ni 7,2020 atang atanga tun hun thlenga damlote an buaipui thu sawiin, hotuten an thlawp that thin thu leh thawhhona tha tak an neih thu a sawi a. Anmahni leh damlote hmakhua ngaia mi inphal tanpuina petu zawng zawngte chungah lawmthu a sawi bawk.

DCHC chhuahsan turte  hnen atangin thusawi ngaihthlak a ni a. Hmangaih taka anmahni enkawltu Medical Staff-te, Sawrkar chungah leh tanpuina petute chungah thinlung takin lawmthu an sawi a ni.

Discharge Card hlan an nih hnuah, Dr. R.Lalrinmawia, Asst. Leader, Treatment Team chuan tawngtaisakna neiin thlahna hun hi a khar a ni.

Tihian tun thlenga Champhai District-a Covid-19 vei awm tawh zat chu mi 10 niin, 8 an dam tawha, mi 2 dangte DCHC, Nursing School Building-ah enkawl mek an ni. 

Tun dinhmunah Champhai district chhunga   Quarantine Centre hman mek pahnih,   District Panchayat Resource Centre (DPRC) leh Champhai Tourist Lodge-ah mi 17 (Mipa 12 leh Hmeichhia 5) te awm mekin, Dedicated Covid Health Centre (Nursing School Building Top Floor) ah mipa 2 an awm mek bawk a ni.