Vawiin khan Agricultural Technology Management Agency (ATMA) Champhai District Governing Board chu an Chairman DC Pu Vanlalngaihsaka, IAS hovin DC Conference Hall-ah an thukhawm.

Chairman chuan ATMA hmalakna te chu district chhunga kuthnathawktute tan malsawmna anih theih thu a sawi a. Tun tuma hmachhawp te hian thlai leh ran enkawl dan a thiamna leh kalphung thar tha zawkte mipui zirtir a vawrh lar leh inhrilhhriat chu a tum ber a nih angin, Line Department-te chu zirtirna pek chungchangah thahnemngai taka thawk turin a sawm a ni.

ATMA Project Director leh Governing Board Member Secretary ni bawk Pu RK Nithanga, District Agriculture Officer chuan thu sawi bawkin, Extention Work Plan chuan a tum ber chu kuthnathawktuten thlai leh ran an enkawl atanga nasa zawka hlawkna an hmuh theih nan tunlai thiamna hmanga kalphung thar hmuhchhuah te chu a hmang tangkaitu tur ber kuthnathawktute hmaa chhawpchhuah a, hman dan zirtir a nih thu a tarlang a. ATMA inrelbawl dan te a sawifiah nghal bawk.

Governing Board Meeting-ah hian kumin 2015-2016 atana hmalakna tur district chhunga block pali a thawh theuh tur Block Extension Work Plan chhawpchhuah chu sawiho a nih hnuin pawm a ni.

ATMA hnuaiah hian district level-ah ATMA Governing Board (Apex body) bakah ATMA Management Committee (Executive body) leh District Farmers' Advisory Committee an awm a. Block level-ah chuan Block Technology Team leh Block Farmers' Advisory Committee an awm theuhva. Village Level-ah hian khua pahnih theuh enkawl turin Farmers Friend 50 ruat an ni bawk a. An ni hian farmer-te hmalakna leh harsatnate District Level a hotute hrilhsak a, office lama thawh tur tuk te farmer-te hnenah hrilhchhawn te chu an mawh a ni.

Cheng nuai 20 senga ATMA Office Building tur tunah sak hna chu tunah hian Agriculture Complex, Champhai Vengsangah kalpui mek bawk a ni.