1236/2022-2023
Champhai, the 13th July, 2022: Vawiin chawhnu dar 1:00 khan Champhai New Market (CHANEM) enkawl chungchanga mawhphurtu CHANEM Management Authority chu an Chairman Pu James Lalrinchhana, District Bawrhsap hovin I&PR Conference Hall, CHANEM-ah an thukhawm.

Pu James Lalrinchhana chuan Champhai khawpui hmel lanna langsar tak CHANEM Building chu Champhai tana hmunhma tangkai leh pawimawh tak a nih thu sawiin, neitu nihna thinlung pu chunga uluk taka enkawl a ngai a ni, a ti a. Hmasawnna rahbi thar chuangkai turin a tahtawla inzirtirna nena tangkawp chunga hmalak a tul thin thu sawiin, member-te chu CHANEM tihhmasawn leh enkawl zelna turah ngaihtuahna senga finchhuah thin turin a sawm a ni.

CHANEM Management Authority Member Secretary, Pi R.Lalnunkimi, DUDO Champhai hnen atangin CHANEM enkawl dan leh kalphungte bakah dinhmun tlangpui ngaihthlak a ni a. He hunah hian Indus Tower Limited atanga CHANEM Building chunga mobile network tihchak nana High Power Small Cell (HPSC) internet tower bun tura dilna lut chu ngaihtuahho a ni a, hriatfiah tul a awm avangin Company hotute nen inbiakrawnna zau zawk neih hmasak ni se, hemi hnu hian inrawnkhawm leha thutlukna siam chauh ni se tih a ni.

CHANEM venhim kawnga tul angte leh Champhai Aizawl Maxi Cab Service Owners Welfare atanga dilna lutte ngaihtuahho a ni bawk a. Rukruk leh dan lova thiltih ven nan CHANEM Building-ah CCTV tha tawk tak hmun engemawzatah bun nise tih a ni a, a hmunhma leh tul angte zirchianga bawhzui tur Sub-Committe din nghal a ni a. Thukhawm chuan CHANEM Complex chu hman khat daih polythene/plastic, Single Use Plastic awm lohna Single Use Plastic Free Complex-a puan tha a ti a. July thla chhungin inzirtirna leh inpuahchahna kalpui hmasak phawt ni se, August ni 1, 2022 atangin a taka kalpuia endikna neih thin ni se tih a ni a. Heng bakah hian CHANEM Complex chhunga lirthei dah thin khuahkhirh dan turte rel a ni bawk.

Champhai khawpui hmel lanna pawimawh tak pakhat CHANEM Building hi CHANEM Management Authority enkawlna hnuaiah awmin Registrar of Firms & Societies, Government of Mizoram hnuaia register a ni a, annual report, activity report leh balance sheet report mumal tak siama kalpui a ni.

CHANEM Management Authority hmalaknain CHANEM Complex-ah kum 2021October thla atang khan Maxi Cab Counter dah a ni a, CHANEM Building-a dawr luahtuten CHANEM Dawrkai Association November ni 2, 2021 khan an din bawk a ni. Tun dinhmunah hian Private Firm, Company leh pawl dangte bakah Sorkar Department UD&PA, I&PR, Health Department Medical Store, FCS&CA, KVI, Fast Track Special Court, Holiday Court leh Transport Department-te chu CHANEM Building-ah hian an awm mek a. CHANEM room luahman atangin a enkawl leh cheithat, thawktu hlawh leh security ruahman a ni.

Attachment

  • Loading attachment...