3020/2022-2023
Champhai, the 12th December, 2022: Hunpui lo thleng tur Christmas 2022 leh Kumthar 2023 puala chakkhai lam leh bazar duhte tana awlsam zawkna tur leh, thlamuang taka hun an hman theihna tur atana ruahmanna kalpui dan tur chungchang relin vawiin chawhnu dar 1 khan Champhai District Bawrhsap, Pu James Lalrinchhana hovin DC Conference Hall-ah inrawnkhawmna neih a ni.

District Bawrhsap Pu James Lalrinchhana chuan hunpui lo thleng turah mipui chakkhai lam leh bazar duh te'n harsatna an tawh lohna turte, ralmuang taka hun an hman theihna tura ruahmanna felfai tak siam a tul thu a sawi a. District mipuite chu sawrkarin him tlanna tura thuchhuah a siamte leh ruahmanna a duante tha taka zawm theuh turin a ngen a ni.

Thutkhawmah hian hunpui Christmas leh Kumthar bazar laia mipui veivakte leh thil zuarte tana awlsam zawk nan December ni 19 atanga 24, 2022 chhung leh December ni 31, 2022 zing dar 10 atanga tlai dar 4:30 thleng lirthei kaltlang phallohna, 'No Vehicle Zone' puan tha tih a ni a. No Vehicle Zone atan hmun 4 ruat a ni a; Vengthlang huamchhung YMA Ralven buk atanga Pu K. Thangdailova In thleng bakah Bazar Area-ah Pi Ronguri In atanga Bazar; Pu Ngunsana building a?anga Bazar; Pu R.Thanliana kawt peng atanga Bazar thlengte chu No Vehicle Zone atan puan nise tih a ni a. Hemi hun chhung hian Taxi Stand hemi huamchhunga awmte pawh Police lam nena inbiakrawnna hmanga ruahmann thar siam sak nise tih a ni bawk.

Heng bakah hian Bazar chung, Awmpuiphei leh inzawrh theihna hmun danga inzawrh dan turte, seat siam leh pek dan turte leh tul angte buaipui turin UD&PA, Commerce & Industries, Vengthlang VC leh YMA te ruat an ni a. Hemi hun chhunga mipuite himna leh pawikhawihna thleng theite laka inven nan Police duty, May I Help You Desk siam nise tih a ni bawk.

He hunah hian Pu H.Lalhruaitluanga, SDO Sadar; Pi Esther Leihang SDC; Pu Vanlalpara, District Marketing Officer (Commerce & Industries), Official dangte, VC, NGO leh Dawrkai Association hruaitute an tel a ni.