3732/2022-2023

Champhai, the 1st March, 2023: Champhai District chhunga National Highway 6 (NH 6) hnathawh kalpui mek chu vawiin chawhnu khan District Bawrhsap Pu James Lalrinchhana, Line Department hotute, NGO hruaitute leh Chanchinbumiten tlawhin hmalaknate an enfiah.

District Bawrhsap Pu James Lalrinchhana chuan Line Department hotute, NGO leh MJA te nena District chhunga hmasawnna ruhrel lian leh pawimawh tak tlawha enfiah a ni leh, hmalaknate ngaihven reng thin a ni chu lawmawm a tih thu a sawi a. Ram leilung neitu dik tak chu keimahni kan nih avangin an hmalaknate uluk taka vilpui reng a pawimawh a ni, a ti a. Leivung paihna, lei tawlh tur venna leh sawisel ngai laite thlithlai a, environment tih chhiat theihna awm angte pawh venpui reng a tul thu a sawi a. Khawchhak tlangdung hmasawnna, changkanna leh kawng engkima mipuite tana awlsam zawkna siam thei tur, NH 6 chu a hlawhtlin hun tur mipuiten nghakhlel taka an thlir a nih avangin hun bituk chhung ngeia zawh hman a nih theih nan leh, inkaihhruainate Company ten an zawm tha em tihte enzui zel turin he huna tel leh district mipuite a sawm a. Thu thlen duh leh infinchhuah ngaihnate a hnena thlen hreh lo turin a chah bawk.

Champhai District huam chhunga NH 6 siam hna thawk mektu NHIDCL hnuaia Contractor, Shri Balaji Construction Company-te hmalakna hrang hrangte endik niin, hmalakna ten leilung, thing leh mau bakah nungchate chennaah nghawng tha lo a thlen thei em tihte enfiah a ni a. Leivung paihna tura ruat spoil bank/muck dumping site-te enfiah a nih bakah paihna tura ruat niloah paih a ni em tihte endik a ni a, leivung tawlh tur danna gabion wall leh check dam siamte pawh enfiah niin, siam belh tul leh mamawhte company hotute bawhzui tura hriattir an ni a. NHIDCL aiawhte leh an hnuaia Contractor-te chu hna tlo leh tha, environment tichhe lo zawnga siam tum turin an chah a. Dan zamte ngaipawimawh chung zela thawk turin an hrilh a ni.

NH 6 kawng laih mek, Khawzawl leh Champhai inkar Package -III Shri Balaji Construction Company-te thawh hi Kilometre 26.78 a thui a ni a. Champhai District huamchin khawchhak Tuipui leh Khankawn inkar, kilometre 11 vela thuiah leivung paihna Spoil Bank/Muck Dumping Site 20 a awm a, hengte hi endik niin 20 zinga 19 ah te leivung dawlna gabion wall siam niin siam lohna awm chhun, kawng laih mek avanga remchang rih lo chu a remchan veleha siam tura hriattir an ni a. Heng bakah hian tui luankawr siam rem ngai laite bawhzui tura tih an ni bawk.

He hunah hian Pu Lalduhthlana DFO, Er. B.Vanlalhruaii, Sr. EE, PWD, Official dangte, NGO hrang hrang hruaitute leh MJA Champhai District member-te an tel a. Pu Abhishek Singh, Site Engineer, National Highway Infrastructure Development Corporation Limited (NHIDCL) leh Pu PL Dhiman, Project Manager, Shri Balaji Construction Company (BCC) te bakah an thawhpuiten an lo dawngsawng a ni.

Shri Balaji Construction Company (BCC) te hian NH 6 Dulte to Champhai huamchhung Package-III, Khawzawl leh Champhai inkar Kilometre 26.78 a thui (84.800 Km to 111.580 Km), cheng vaibelchhe 370 senna tur an thawk a. Vawiin March ni 1, 2023 thleng hian physical progress chu 75.14% niin, financial progress hi 63.03% vel a ni a. Package -III hnuaiah hian leidawh 3 a awm a, a lian ber Champhai leh Khawzawl District inrinaa awm khawchhak Tuipui lei Metre 60 thui dawh mek leh a dangte chu kumin March thla chhunga zawhfel hman beisei a ni a, Culvert 148 siam turah 129 thawh zawh tawh a ni bawk a. Champhai District huam chhunga NH 6 Kilometre 11 vela thui siam turah Kilometre 1.6 a thui tih loh chu laih tlang vek tawh a ni a, hmalak mek zel a ni. An package chhungah hian GSB phah tawh Kilometre 21, WMM Kilometre 18 bakah black topping Kilometre 9 vela thui an siam tawh a ni.

Shri Balaji Construction Company-te hian tuna an kawng siam mek hi kum 2021 October thla atang khan an thawk tan a; June ni 25, 2023 a zo hman vek tura bituk niin hun bituk chhung ngeia zo hman turin hma an la mek a. Kum hnih chhunga zo hman tur leh a hnu kum 5 chhung enkawl chhunzawm tura tih an ni.