63/2022-2023
Champhai, the 6th April, 2022: Vawiin khan Champhai District Bawrhsap thar Pu James Lalrinchhana, MCS chuan Champhai District enkawltu Sawrkar Department hrang hrang hotute chu DC Conference Hall-ah inhmelhriattirna leh inkawmna hun a hmanpui.

Pu James Lalrinchhana chuan Sawrkar Department hrang hrang hotute chu an tawnhriat leh remhriatna neihte District leh a chhunga chengte tihhmasawn nana chhawr tangkai thiam tura chahin, tun hma District lian tak ni thin Champhai District thendarh a nih tak avangin hneh zawk leh hun tam zawk pe chunga enkawl thei tura tan la sauh sauh turin a fuih a. District Administration kengkawhtu ber DC Office chu dawr hrehlo tur leh harsatna leh mamawh an neihte thlen nana hmang thin tura sawmin, thawhhona a that phawt chuan District leh mipuiten an hlawkpui dawn a ni, a ti a. Department kaltlanga hmalakna leh puanzar tul awmte bialtu MLA, NGO, VC leh mipuite hriat theih tura chhawp chhuak thin tur leh inlaichinna leh thawhhona tha siam a pawimawh thu hrilhin, kan zavaia telhonaah chuan project leh hmalakna ang chi reng rengte a hlawhtling thin a ni, a ti bawk.

Bawrhsap chuan hmasawnna ruhrel lian leh changkang ber berte nei mai ila thinlung kan ven hmasak phawt loh a, rilru sukthlek a tha zawnga kan thlak hmasak phawt loh chuan hmasawnna khingbai leh awmze neilo kan nei dawn a ni, a ti a. Rilru, taksa leh thlarau nun siam dik chu ngaihpawimawha neih hmasak a tul takzet thu tarlangin, hengte hi a bikima kan neih chauhin hmasawnna ngelnghet leh tluantling kan nei thei dawn a ni, a ti bawk. District chhunga Department hrang hrangte chakna, tanlak ngaihna leh hmachhawpte zirchiana hmalak tum a nih thu leh, tanrualna leh thawhhona tha tak nen District hmasawnna hmuh ngei a beisei thu a sawi a. Sawrkar hnathawkte chu sawrkar mi an nih angin sawrkar dante tha taka zawm tur leh inkaihhruaina Conduct Rules te chhiar nguna zawm fo turin a chah a. Hnathawh nan social media tangkai taka hman theih a nih laiin chin tawk neia fimkhur taka hman thiam erawh a tul thu pawh a sawi bawk a. Sawrkar Department hotu kalkhawmte chu a theih leh remchan dan ang zela hnathawh inhriatpuitawn tur leh hnuhma tha hnutchhiah tum theuh turin a fuih a. District Level Committee koh nikhuain, thutlukna siam zung zung a nih theih nan leh meeting hlawkthlak tak neih a nih theih nan tha taka inpuahchah lawk thin a ngaih dawn thu a sawi bawk a. Department hotute chu District tihhmasawn nan leh mipui rawngbawl kawngah tawiawma leh finchhuah thin turin a sawm a ni.

He hunah hian imhmelhriattirna neih a nih bakah Department hmalakna leh hmachhawp neih angte sawiho a ni a. Champhai District chhunga inbiakpawhna tih changtlun a nih theih nana hmalak tulte, Vawk hrileng mek punlun zel loh nana hmalak tawhna, hmachhawp leh inzirtirna tulte, District venhim leh dan lova thiltih dolet kawnga tanrual a tul thu te bakah, tul dangte inpawhtlang taka sawiho a ni a. Hmalakna leh hmachhawpte inhriatpuitawna inhrilhhriat a nih theih nan quarter tinah vawikhat tal thutkhawm neih ni se tih a ni bawk.

Vawiin thutkhawmah hian SP Pu Lalrinpuia Varte, Addl. DC Pu Henry C.Lalrawnkima leh Sawrkar Department hrang hrang hotute bakah Assam Rifles, Customs leh Bank hotute an tel a ni.