No.1596/2021-2022

Aizawl the 28th July 2021: Champhai District Bawrhsap Pi Maria C.T Zuali chuan vawiin khan Champhai District Khawbung RD Block huam chhung Khuangleng, Dungtlang leh Samthang khuate tlawhin kuthnathawktute tana hmalakna tur hrang hrang VC te leh loneitute a sawipui.

Bawrhsap chuan VC te chu khawtlang tana rawngbawl an ni tih hria a khawtlang hmasawnna tura theihtawp chhuah turin a chah a. Gram Panchayat Development Plan (GPDP)/ Village Development Plan (VDP) siam kawngah khawtlang mamawh leh tul angte felfai taka thun kim a, a hun taka thehlut thin turin a chah a. Hamthatna awmte dawng thei turin a theih chen chenah Society din a, intelkhawma hma la thin tur leh mithiamte rawn zel turin a chah bawk a ni.

Horticulture Department ruahmanna Vegetables Supply Chain kaltlanga Samthang Farmers Association te'n Zikhlum Quintal 100 dawn, Aizawla thawn tur an buatsaih mekte pawh a hmuna tlawhin an hmalakna leh mamawhte a sawipui a. LLTF Aizawl biakpawhna tur an lakkhawm thu leh, DHO Champhai Office-ah Vegetables Supply Chain buaipui tur Call Centre din fel a nih thu a sawi bawk.

DHO Champhai Pu B. Lalzarzova chuan Vegetables Supply Chain kaltlangin thlai thar chhuahte a theih ang angin mamawhna hmunahte thawna buaipui zel tum a ni tiin, Zikhlum tharte Aizawl bakah Lunglei, Kolasib leh District dangahte thawn tuma biakpawh mek zel an ni, a ti bawk.

Pi Maria C.T Zuali hian vawiin vek khan NEC kaltlanga siam mek Samthang Nature Park tlawhin hna thawh kal lai a enfiah a. Dr. C. Malsawmkima, Khuangleng, Mizo zinga Nephrology Superspecialist hmasa ber chu tukin khan tlawhin DC hian a lawmpui thu leh, zirna kawnga Champhai District tihmingthaa, zirna tihhmasawn kawnga Zirlaite entawn tur ropui tak a lantir chu fakawm a tih thu a hrilh a ni.

District Bawrhsap hi Pu B.Lalzarzova DHO, Dr. Lallawmkima DIPRO, Pu Lalhmunsanga DFDO leh Pu Obed Lalmalsawma SDC ten an tawiawm a ni.