1113//2023-2024

Champhai, the 12th July, 2023: Champhai District Cricket Association (CDCA) buatsaih Night Cricket Tournament hawnna hun nizan dar 7:30 a HVS Futsal Ground Zotlanga hman chu Champhai District Bawrhsap Pu James Lalrinchhana, District Sports Committee Chairman ni bawk chuan khuallian niin a hmanpui.

Khuallian Pu James Lalrinchhana chuan Champhai District Cricket Association-in thalai infiammite tana zan lam hun tha hmang tangkaia Cricket Tournament a buatsaih thei chu lawmawm a tih thu a sawi a. Champhai District chhungah hmasawnna ruhrel pawimawh dangte thlahthlam chuang lovin zirna, hriselna leh infiamnate ngaih pawimawh a nih thu sawiin, ruihhlo do kawnga pawimawh tak te an nih hlawm avangin hengte hi chawinun zel a tul a ni, a ti a. Thalaite chu ruihhlo leh a kaihhnawih laka fihlim tum tur leh midangte tana zirtirtu nih tum turin a fuih a. Rilru, taksa leh thlarau nun hrisel nei turin infiamna ngai pawimawh chhunzawm zel turin a sawm a. Night Cricket Tournament chuan rah tha a chhuah ngei beisei chung leh duhsakna hlan chungin a hawng a ni.

He hun hi Pu JH Vanlalhruaia'n kaihruaiin Tv Lalhmachhuana'n hunserh a hmang a. Dr. Vanlalnunpuii Ralte SDC-in Systematic Voters' Education and Electoral Participation (SVEEP) campaign neiin, Pu VL Hruaimawia, DO, DM&R Champhaiin chhiatna thlen thulha chetlak dan tur zirtirna hun a hmang a. Pu Zorinkima Hnamte, President CDCA-in thu a sawi hnuah night cricket tournament khelh tan a ni.

Night Cricket Tournament hi Champhaia cricket tih hmasawnna leh mi tam zawkin an tuipui theih nana buatsaih a ni a. July ni 11-18,2023 chhung hian HVS Futsal Ground, Zotlangah neih a ni dawn a. He tournament hi Champhaia Local Cricket Tournament hmasa ber tur niin, hmeichhe team 2 leh mipa team 16 te an tel thei a ni.