3581/2022-2023
Champhai, the 14th February, 2023: Vawiin chawhnu dar 2 khan Champhai District tana hmalakna tur pawimawh hrang hrangte District Bawrhsap Pu James Lalrinchhana leh Champhai District All NGO Committee hruaituten DC Conference Hall-ah an sawiho.

Pu James Lalrinchhana chuan Sawkar hnathawk leh NGO hrang hrangte chu mipui rawngbawl tur leh an hmakhua ngaia theihtawp chhuah tur an nih thu sawiin, mipui aiawh an nihna inhre chungin ram leh hnam tana tanrual thiam a pawimawh thu a sawi a. Dan hnuaiah theihtawp chhuaha hmalakho thin a pawimawh thu sawiin, infinchhuah tlan zel erawh a tul dawn a ni, a ti a. Thenawm ram buai avanga an la inpeih loh lai pawhin ramri kaltlanga sumdawnna dan ang taka kalpui a nih theih nan Sawrkarin theihtawp a chhuah mek thu leh, hmunhma cheibawl hna kalpui mek a nih thu a sawi a. District hmasawn turin tanrual a pawimawh thu a sawi a. Heng bakah hian Champhai District tana pawimawh hrang hranga hmalakna awmte a tarlang bawk.

Thutkhawmah hian Keilungliah tuikhuah enkawl leh venhim chungchangte pawh sawiho niin, Keilungliah tuikhuah fai leh thianghlim siam turin a chawmtu hnar zawng zawngte uluk lehzuala enkawla, hnawm paih lo tura inzirtirna kalpui a tul thu tarlan a ni a. Champhai khawpui chawmtu khawchhak Tuipui hnar humhalh leh tuihna tlem zel ven kawnga hmalak tulte sawiho niin, uluk zawkin mithiamte rawn chunga zirchianna neih nise an ti a. Heng bakah hian Road Safety Committee, Ruihhlo do kawnga hmalakna hrang hrangte, Consumer Forum tih chak, Traffic Management leh Swadhar Greh chungchanga hmalaknate sawiho a ni.

He hunah hian NGO lam atangin an hmalaknate ngaihthlak a ni a; District hmasawnna tura pawimawh leh vei zawng hrang hrangte inpawhtlang taka sawiho niin, March thla chhungin khawchhak Tuipui hnar leh a chhehvelte thianfaia hnatlangpui neih nise an ti bawk.