561/2022-2023
Champhai, the 20th May, 2022: Champhai District chhunga khua panga; Khankawn, Zote, Mualkawi, Khuangleng leh Kelkang-a Vawk engemawzat thite thih chhan chu African Swine Fever (ASF) a ni tih finfiah a nih avangin Dr. B.Lallawmsanga, District Animal Husbandry & Veterinary Officer (DAH&VO) Champhai chuan 'The Prevention and Control of Infectious & Contagious Disease in Animal Act 2009, Section 20 Sub-Section I in thuneihna a pek angin Khankawn, Zote, Mualkawi, Khuangleng leh Kelkang khuate chu vawiin May ni 20, 2022 atanga thuleh awm hma Vawk hrilenna hmun 'Infected Area' ah a puang.
African Swine Fever lenna hmun Infected Area a puan tak khuaahte hengte hi zawm ngei tur a ni.
1. Infected Area atanga Vawk lakchhuah emaw lakluh emaw phal a ni lo.
2. Vawk thi reng reng paih mai lovin, chinai (lime) nen thuk taka phum tur a ni.
3. Infected Area huamchhungah Vawk talh leh vawksa zawrh khap tlat a ni.
Vawiina puan belh takte nen hian tun dinhmunah Champhai District chhunga veng leh khua 22 te chu Vawk hrilenna hmun Infected Area-ah puan a ni a, veng leh khua 4 atanga sample lak result ngaihchan mek a ni bawk. ASF hrileng leh hrileng ni ngeia rinhlelh hian District chhung khua leh veng 26 te a luhchilh mek a ni.
A.H & Vety. Department chhinchhiah danin Champhai District-a ASF hrileng thawhhnihna, kumin February ni 4 atanga hmuhchhuah a nih hnu vawiin May ni 20, 2022 thleng khan Vawk 1,931 an thi tling tawh a, fimkhur thuah Vawk 2,021 te suat an ni tawh a, Vawk thi leh fimkhur thua suat tawh zawng zawng belhkhawm zat chu 3,952 a tling tawh a ni. Vawiin bikah chuan Vawk 27 thiin, Vawk 24 suat an ni.
Vawiin May ni 20, 2022 thlenga Vawk hrilenna hmun/ Infected Area-a puan tawh Champhai District chhung khua leh veng 22 te chu hengte hi an ni:
1. Electric Veng
2. Zion Veng
3. Zotlang
4. Dinthar Veng
5. New Champhai
6. Vengthar
7. Vengsang
8. Bethel Veng
9. Dilkawn
10. Farkawn
11. Ruantlang
12. Buang
13. Melbuk
14. Vengthlang North
15. Venglai
16. Hmunhmeltha
17. Khawbung
18. Khankawn
19. Zote
20. Mualkawi
21. Khuangleng
22. Kelkang
