711/2024-2025

Champhai, the 7th June, 2024: Mizoram Co-operative Apex Bank Ltd. buatsaihin vawiin khan Champhai Vengthlang Community Hall-ah  Champhai District chhunga Primary Agricultural Credit Societies (PACS) hrang hrangte pualin Awareness Campaign neih a ni. PACS Awareness Programme hi NABARD leh MCAB hnuaia Comprehensive Support Plan bultuma huaihawt a ni.

Khuallian ni a he hun hmanpuitu District Bawrhsap Pu James Lalrinchhana chuan Mizoram dung leh vanga society chak tak takte hmalakna chhuanawm a tih thu sawiin, tun aia tangkai lehzuala kan chhawr thiam a tul a ni, a ti a. PACS member-te'n hruaitu tur thlanga inrelbawlna an kalpui thin chu ropui a tih thu leh Co-operative society inrelbawl dante chu India Danpuiah chiang taka tarlan a nih thu sawiin, State sawrkar hnuaia mumal taka kalpui dan tur pawh ruahman a ni, a ti a. Society hnuaiah member te'n intluktlanna leh chanvo an nei chu entawntlak a tih thu sawiin, hei hian zonun zemawi 'Sem sem dam dam, ei bil thi thi' tih kha a chawinung zel a ni, a ti bawk.

Pu James Lalrinchhana chuan PACS chu thingtlanga chengte'n leirem an rah theihna tura tangkai tak a nih thu sawiin, kalkhawmte chu khawtlang leh ram hmasawn nan theihtawp chhuah zel turin a fuih a. Hruaitute chu hmathlir thui tak neia thahnemngai taka thawk zel tur leh member-te nen lungrual taka hmalak tlan tum zel turin a chah a. Sawrkar hmalaknaah PACS te an pawimawh deuh deuh dawn thu sawiin, a tha zawnga thil thlakthlengtu nih tum tlat tur leh rintlak nih tum turin a fuih a. An tana NABARD, MCAB Ltd. leh hmun dang dang atanga hamthatna lokal thinte chhawr tangkai zel tum turin a chah a. Sawrkar nena thawhhona ngaipawimawh turin a chah a, midangte tana malsawmna nih chhunzawm zel tum turin a fuih nghal bawk.

Thusawitu dang Pu Lalnunsanga, Chairman, MCAB Ltd. chuan bank awmlohnaah PACS mamawhna a san thu sawiin, Mizoramah PACS tha taka kalpui mek 51 a awm thu leh society tha tak PACS a inlet an awm zel thu a sawi a. Khawvela ram thang chak leh hmasawn ni turin India ram sawrkarin PACS tihchangtlun a ngaihpawimawh thu sawiin, PACS hmalaknaah  sawrkarin rinna a nghat tlat a ni, a ti a. Champhai District-a PACS te chu Mizorama tha ber berte an nih thu tarlangin, Mizoram Co-operative Apex Bank Ltd. chuan PACS hmasawn nan tiin mawhphurhna a inpek thu leh a theihna a pianga din tura hmalak a tum thu a sawi a. Cooperation Department nena thawhhona tha tak an nei chu lawmawm a tih thu sawiin, PACS chu loneitu leh thingtlang kuthnathawktute chawikan nana pawimawh tak a ni, a ti a. Mizoram Co-operative Apex Bank Ltd. (MCAB) leh PACS te chu an inzawm tlat thu sawiin, MCAB Ltd. in kum kaltaah cheng vaibelchhe 42.46 hlep an neih thu leh hemi atanga nuai 42 dawn chu PACS leh Cooperative inzirtirna lam hawi hmalakna atan dah a ni, a ti bawk.

Pi H. Lalhmachhuani, DDM, NABARD chuan NABARD in PACS ngaipawimawhin kum 2016-2017 ah PACS Development Cell (PDC) a din thu leh PACS 33 te tihchangtlun tura chhawpchhuah an nih thu a sawi a. Hemi atang hian deposit, share capital leh loan-ahte langtheia hmasawnna hmuh a nih thu a sawi a. NABARD-in Comprehensive Support Plan cheng nuai 95.8 a pek thu sawi bawkin, hengte hi loan awm lo, grant vek a ni, a ti a. PACS Computerization kalpui mek a nih thu tarlangin, Mizoramah pilot project atan PACS 25 te thlan hmasak an ni a; heng zinga 5, Large Size Agriculture Multipurpose Co-operative Society (LAMPS) Ltd., Champhai Town Multipurpose Co-operative Societies (CTM-PACS) Ltd., Champhai Agriculture Farming Cooperative Society Ltd., Vaphai PACS Ltd., leh Bethel Women Multipurpose Cooperative Society Ltd., te chu Champhai District atanga thlante an ni, a ti bawk.

He hun hi Pu C. Lalhmunliana, BoD, MCAB Ltd. chuan kaihruaiin Upa Lalchhawnthanga, BoD, MIZOFED Ltd. in hunserh a hmang a. MCAB Ltd. BoD Pu Rosiamliana Ralte leh Pu R. Lalrempuia te hnen atangin thusawi ngaihthlak a ni a. Pu J. Lalchhuanawma, Manager, MCAB Ltd., Champhai Branch-in lawmthu sawiin first session a khar a ni.

PACS Awareness Campaign hi chawhnu lamah Pu C. Lalhmunliana, BoD, MCAB Ltd. kaihhruaiin neih chhunzawm a ni a. He hunah hian Pu B. Lalchhanhima, DCO Champhaiin thu a sawi a. Resource Person Immanuel Lalpianfeli leh F. Lalhluzuala, PACS Development Cell (PDC), MCAB Ltd. te'n PACS te tana pawimawh leh tul hrang hrangte an zirtir a ni.

He huna tarlan a nih dan chuan tun dinhmunah Champhai District-ah PACS 20 awmin society share holder mi 227 an awm mek a ni.