Vawiin chawhnu khan AH & Vety Department buatsaihin vawk natna chi khat Porcine Reproductive and Respiratory Syndrome (PRRS) vanga Champhai District-a kum 2016 chhunga vawk thi 3,512-te ralna Kahrawt Community Hall, Champhaiah neih a ni a. He hunah hian Champhai North bialtu MLA Pu TT Zothansanga chu khuallian niin ralna sum hi a dawngtu turte hnenah a hlan a ni.

Khuallian Pu TT Zothansanga chuan Vawk thi ralna hun hman a ni chu thil dangdai tak tun hma la awm ngailo a ni, a ti a. PRRS natna vanga Vawk chante chu thinlung taka a tawrhpui thu sawiin an tawrhnate chu sawrkarin a hriatpuia, tanpui an ngaihna leh an kal zelna turah a tawiawm zel dawn a ni, a ti.

Dr. M.Zohmingthangi, District AH & Vety Officer pawhin thu sawiin PRRS vanga Vawk thite zangnadawmna atan hian sawrkar laipuiah pawisa dil a ni a, mahse an pek theih tawh loh avangin hmuh a ni lo a ni, a ti a. Pu C.Ngunlianchunga, Minister AH&Vety. hmalaknain  Mizoram sawrkar chuan vawk thite ral nan hian cheng nuai sawmthum (30 lakhs) a pek thu a sawi a. He sum hi zangnadawmna (Compensation) anga, ran thi hlutna anga chhutchhuah a ni pha lova, amaherawhchu Mizo te’n chhiat tawkte kan in ngaihsaka kan inral thin anga daih zau zawk tura sem a ni a ti bawk.

Champhaiah hian NLUP dawngtu chhungkaw 1,071 atangin vawk thi 3,512 a awm a. Vawk thite hi a note leh thanglaiah Rs 500/- theuh leh a puitlingah Rs 1000/- theuha ral an ni a. Mizoram District parukah PRRS natna hi nikum khan a lenga, heng zingah hian Champhai hi PRRS tuar nasa ber a ni a. Chhungkua 1,839-in an Vawk 5,812 lai an chan a ni. Vawiina  vawk thi ralna sum sem chhuah zawng zawng hi a vaiin cheng Nuai Sawmhnih pakhat Singkua leh Zanga (Rs 21,90,500/-) a ni.

Vawiin programme hi Dr. M.Zohmingthangi, District A.H &Vety. Officer, Champhaiin a kaihruai a. Dr. C. Lalsawithuama, Chief Veterinary Officer (CVO) in lawmthu sawina neiin hun a khar a ni.

Attachment

  • Loading attachment...