482/2022-2023
Champhai, the 12th May, 2022: Champhai District chhung veng leh khua pali; Vengthlang North, Venglai, Buang leh Melbuk chhunga Vawk engemawzat thite thih chhan chu African Swine Fever (ASF) a ni tih finfiah a nih avangin Dr. B.Lallawmsanga, District Animal Husbandry & Veterinary Officer (DAH&VO) Champhai chuan 'The Prevention and Control of Infectious & Contagious Disease in Animal Act 2009, Section 20 Sub-Section I in thuneihna a pek angin Vengthlang North, Venglai, Buang leh Melbuk te chu vawiin May ni 12, 2022 atanga thuleh awm hma Vawk hrilenna hmun 'Infected Area' ah a puang.

African Swine Fever lenna hmun Infected Area a puan takahte hian hengte hi zawm ngei tur a ni.
1. Infected Area atanga Vawk lakchhuah emaw lakluh emaw phal a ni lo.
2. Vawk thi reng reng paih mai lovin, chinai (lime) nen thuk taka phum tur a ni.
3. Infected Area huamchhungah Vawk talh leh vawksa zawrh khap tlat a ni.

Vawiina puan belh takte nen hian tun dinhmunah Champhai District chhunga veng leh khua 16 te chu Vawk hrilenna hmun Infected Area-ah puan a ni a, veng leh khua 8 atanga sample lak result ngaihchan mek a ni bawk. ASF hrileng leh hrileng ni ngeia rinhlelh hian District chhung khua leh veng 24 te a chimbuai mek a ni.

A.H & Vety. Department chhinchhiah danin Champhai District-a ASF hrileng thawhhnihna, kumin February ni 4 atanga hmuhchhuah a nih hnuah vawiin May ni 12, 2022 thleng khan Vawk 1,566 an thi tling tawh a, fimkhur thuah Vawk 1,515 te suat an ni tawh a, Vawk thi leh fimkhur thua suat tawh zawng zawng belhkhawm zat chu 3,081 a tling tawh a ni. Vawiin bikah chuan Vawk 43 thiin, Vawk 71 te suat an ni.