No.6488/2020-2021

Dated Champhai, the 10th November, 2020: Champhai District Consultative Committee (DCC)/ District Level Review Committee (DLRC) chu an Chairman  Pi Maria C.T Zuali, Champhai DC hovin vawiin khan DC Conference Hall-ah an thukhawma, June 2020 Quarter tawp thlenga Bank leh Stakeholder hrang hrangte hmalakna an thlirho a ni.

Pi Maria C.T Zuali chuan Covid-19 hripui leng kara DCC meeting pawimawh tak neih a ni thei chu lawmawm a tih thu sawiin, ram sum pai dinhmun siamthat kawngah Bank loan pekchhuah chuan awmzia a nei thui hle a ni, a ti a.  Bank a sum dah luh leh pekchhuah khaikhinna Credit Deposit Ratio inthlau lutuk chu ngaihmawhawm a tih thu sawiin, Credit Deposit Ratio tha zawk nei thei turin Bank-te chu inhawng leh zual turin a chah a. Bawrhsap chuan mitinte banphaka Banking facilities chhawp a tul thu sawiin, Bank kaltanga hamthatna awmte a dawng tur te’n an dawn theih ngeina turin zau zawka inzirtirna  kalpui a tul takzet a ni, a ti bawk. Loan puktute pawh loan rulh ngaipawimawh tura chahin, loan rul tha lote umzui kawngah DC Office chuan Banker-te a  tawiawm tlat dawn thu a sawi a ni.

 He Meeting-ah hian Pu L.Lawmvela,  Lead District Manager, SBI Lead Bank Office Champhai chuan kalkhawmte lawmna thu a sawi hnuah kumin June 2020 Quarter tawp  thlenga Champhai District chhunga Bank hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni.

Meeting-a tarlan anih danin kumin June 2020 Quarter zawh thlenga Champhai District-a Bank hrang hranga pawisa dahluh leh pekchhuah khaikhinna Credit Deposit (CD) Ratio chawhrual chu 42.43 % a ni a, March Quarter tawpa  CD Ratio 45.47 % aiin 3.04 % in a hniam a,  CD Ratio bituk zat  60 % chu a phak lo  a ni.  2020-2021 Financial Year chhunga Annual Credit Plan (ACP) hnuaia hnathawhte thlirho ni bawkin, Priority Sector Advances atana target cheng nuai 7785.78  atangin cheng nuai  1073.79 (13.79%)  tihhlawhtlin niin, Non Priority Sector hnuaia target cheng nuai 1230.00 atangin cheng nuai 344.01 (27.97%) tihhlawhtlin a ni a. Pradhan Mantri Mudra Yojana (PMMY) hnuaiah mi 70 (Sishu-8, Kishore-52, Tarun-7, Stand Up India-3) te hnenah loan cheng nuai 63.44 hu pekchhuah a ni bawk.

June 2020 Quarter tawp thlengin PM Kisan Beneficiaries dawng 3629 an awm a, heng zinga mi 89 (2.45%) te hnena KCC Loan pek zat chu cheng nuai 75.70 a ni a, mi 135 te hnenah KCC Loan cheng nuai 152.49 hu pek chhuah a ni a, Animal Husbandry hnuaiah mi 22 te hnenah cheng nuai 24.91 pek a ni. Priority Sector hnuaia Segment hrang hranga Non Performing Asset (NPA) tlingkhawm zat chu cheng nuai 1539.12, 3.75% niin, Non Priority Sector hnuaia NPA tlingkhawm zat chu cheng nuai 57.84, 1.61% a ni. Loan rulh that loh Bakijai Case 42 cheng nuai 21.61 hu vel awmin, Mizoram Co-operative Apex Bank-ah cheng nuai 10.60 leh Canara Bank-ah cheng nuai 11.00 a awm thu tarlan a ni. Thingtlang/Zokhaw mite tana bank hman dan zirtirna Digital Financial Literacy Awareness Programme tum 2 neih a ni. 

He hunah hian Annual Credit Plan Target chungchang sawiho nghal niin, Financial Year 2020-2021 chhunga PMAY (U)/ HFA hnuaia Bank hrang hrangte target tura bituk  150 chu ti hlawhling vek thei tura pawm a ni a. Agriculture kaihhnawiha target 3657, cheng nuai 4788.25 senna tur chungchanga Bank hrang hrangte hmalakna tur  chu thlirhoa  pawm a ni a. Social Security Scheme kaltlanga hamthatna mipuite’n an chhawr tangkai theihna turin zau zawka inhrilhhriatna neih nise tih a ni a. Heng bakah hian Bank Security  chungchang sawiho anih bakah inkaihhruaina tha zawk awm theih dan turte sawiho niin, Bank tinte pawh chak zawka hma la a, quarter tawp ni atanga chhiara ni 15 chhunga data thehlut thin tura hriattir an ni a.   

Tun dinhmunah hian Champhai District-ah  Bank branch hrang hrang  14 awm mekin, Public Sector Bank 4, Private Sector Bank 4,  Regional Rural Bank  5 leh State Cooperative Bank 1 te an awm mek a.  ATM 9,  Business Correspondent 8, CSP 1 leh IPPB hnuaia Banking Touch Point 26 te an awm mek a ni.