Vawiin India Republic Day vawi 60-na lawmna chu Champhai Chhangphut Field-ah zing lam dar 10 atangin hman a ni a. District Bawrhsap Pu Vijay Kumar Bidhuri, IAS chu khuallian niin Hnam Puanzar a pawt pharh.

District Bawrhsap Pu Bidhuri chuan thu sawiin He ni ropui takah hian kan hruaitute huaisenna, Ram hmangaihna leh midangte tana Inpekna avanga zalenna min siamsaktu leh dinhmun sang taka min hlangkaitute kha i hrereng ang u tiin, mi huaisen kan ram tana martar-te leh rilru thui tak pu chunga zalenna te, Intluktlannate leh inunauna te, rinawmna leh dikna kan khawtlang nunah te, eibar zawnna ah te leh, politics lamahte kan neih theih nan, hun harsa tak hnuaia, Danpui tha tak min duanchhuahsak a, kum 1950 January ni 26-a khawvel hriata kan hnam, mahnia ro in rel mipui lalna ram kan nih puangchhuaktute kha, zahna hlanin i hrereng ang u a tiin kalkhawm te chu a chah a ni.

A sawi zel naah khuallian chuan he thumal ‘Republic’ tih chu thu satliah a ni lo va, kan ramah hian thuneihna chu khawi maw laia intilal thenkhatte ta ni lovin, ram chhung mipuite kuta awm anih tarlangtu a ni a, Rabindranath Tagore-an thi leh tawh ngailo tura ‘Jana - Gana’ a lo phuah chhuah angin kan ram mipui inpumkhatna hi India chakna thahrui chu a ni a ti. Champhai District hi mihring nun kawng hrang hrang heng-zirna te, zai leh lamte leh a bik takin infiamna lamah te, mi chhuanawm tak tak te awmna hmun a ni a. Zuk leh hmuam kan tihtlem vang pawh a ni maithei a, he chindan thalo hi keimahni, kan fate leh kan ram tan i bansan ngam ang u tiin mipuite chu a sawm a ni.

Central School (Kendriya Vidhalaya) Champhai a kan neih theih nana rawtna sawrkar laipuiah thlen anih thu sawiin Bawrhsap chuan tun atanga reilote ah kan nei thei dawn niin a lang a ni tiin school naupangte chu karkhat ah artui vawikhat tal pe thin turin Headmaster te hriattir an ni a ti a. Ram dan kalhtu - drugs zuarte, ralthuam hmanga tharum thawh chingte, phalna lova silai kawlte, silai tawlh rutute leh an thurualpuite ngaihdam an ni dawn lo a ni tiin a thil ngaih pawimawh ber chu NLUP anih thu sawiin a pawimawhna chhan ber sawrkar hmalakna ki pui ber anih bakah ram mipuite tana eizawnna ngelnghet a pek vang a ni ati a, ram hmasawnna atan tha thawh ve duh chuan NLUP hlawhtlinna ngei tura hmala turin mipuite chu a sawm a ni. Hringlang tlanga District Park tih hmasawn chu ngaih pawimawh hmasak tur anih chhan chu he park hian kan hnam nunah hmun pawimawh tak a luah tlat vang a ni ti.

Kumin Republic Day Champhai District a hman ah hian March Past entir contingents 22 an awm a, SI Zoramthara Khawlhring chu Parade Commander a ni. March Past a lawmman latute chu : 1na - Govt.G.MHSS(Girls), 2na- Govt.Champhai H/S(Boys), 3na-BC Lalthlamuana Academy (Boys) te anni a. Vawiin Republic Day lawmna-ah hian zaithiam, Cheraw leh lam hmuhnawm tak tak te ngaihthlak leh entur a awm a ni.

Kumin Republic Day ah hian Champhai district mi 13 sports Discipline hrang hrang a National level Medalists (2009 & 2010) te hnenah Award hlan a ni a. Republic Day pual hian Football leh Volleyball Tournament buatsaih a ni a, he chanchin buatsaih lai hian final khelh mek a ni.

Republic Day lawmna zawh ah hian sawm bikte pualin D.C complex Keifangtlanga Jericho Garden-ah At Home neih a ni.