890/2025-2026

Champhai, dated 23rd June 2025: Tunhnaia ruah sur nasa avanga chhiatna hrang hrang te thlirho tur leh he mi avanga mipuite harsatna sutkian dan tur relin vawiin khan Champhai District Disaster Management Authority chu an Chairman, Champhai Bawrhsap Pu Mohammad Aaquib a hovin DC Conference Hall, Keifangtlangah an ṭhukhawm.

He hunah hian Champhai Bawrhsap Pu Mohammad Aaquib chuan June ni 22, 2025 tlai lam aṭanga ruah tam tham tak a sur avangin Champhai District leh khawpui chhungah chhiatna nasa tak a thleng chu pawi a tih thu leh chhiatna tawk te a tawrhpui thu a sawi a. Harsatna nei te pui turin Bawrhsap pisa chu an inhuam reng tih a sawi bawk. Bawrhsap hian chhiatna hrang hrang thleng avanga harsatna awm thei te sutkian a nih theih nan a hmalatu VC, YMA, PWD, P&E, NHIDCL, SBCC leh department hrang hrang te chungah lawmthu a sawi bawk a ni.

Vawiin ṭhutkhawmah hian Champhai District chhunga chhiatna lian tham thleng mek - NH-06 Chhungte khaw hnuaia leimin kumhlun chungchang te, Champhai Vengsanga Assam Rifles Camp atanga lei tawlh chungchang te, Vengsang MPRO Road chhan nana motor lian tlan phal loh chungchang te bakah leivung paihna chungchang te sawiho a ni.

He hunah hian Zonal Officer ten an bial chhung theuha chhiatna thleng hrang hrang te an report a, Department hotu ten an department kaihhnawih theuh report an pe bawk. Champhai District chhungah hian May ni 30 aṭang khan chhinchhiah theih chinah leimin hmum 265-ah a thleng tawh a, leimin avanga in chhia 15 awmin, leimin vanga boral mi pathum leh hliam pahnih an awm tawh a ni.