Vawiin khan Champhai District Election Officer, Champhai District Bawrhsap ni bawk Pu Lalthangpuia Sailo IAS chuan MLA General Election 2013 tluang taka neih anih avangin mipuite hnenah lawmthu a sawi.

Champhai District Election Officer chuan, Mizoram Assembly inthlan (vote thlak thleng) tluang taka kan zo thei chu lawmawm a tih thu a sawi a, hemi thleng thei tura DC Office-a Officer leh Staff te, DRDA Officer leh Staff te, NIC Staff te, DIPRO leh a Staff te, venghimtu Police Officer leh sipai zawng zawngte, MPRO a thawk zawng zawngte chungah lawmthu a sawi a, Polling Party atana ruat zawng zawngte, team hrang hranga thawk zawng zawngte chungah lawmthu a sawi a, an thawhhona tha tak avanga inthlan chu tluang taka zofel thei an nih thu a sawi.

Champhai District Election Officer chuan, tunah hian vote pawh a hun taka chhiar mai theih turin EVM te chu Strong Room ah uluk taka ven an ni tawh a, EVM te hi party miten an duh chuan a venna hmunah hian riahchilh hial pawh phalsak an nih thu a sawi bawk. Pu Lalthangpuia Sailo IAS chuan, MPF te thawhrimna ah pawh lawmthu sawi bawkin, hlawh leh hlawkna pawh beisei miahlova inthlan boruak felfai taka a kal theihna tura an thawhnate avangin MPF te chungah lawmthu a sawi bawk a ni. Champhai District Election Officer chuan, Pathian hruaina zawng zawng ah lawmthu sawi bawkin, khaw tha leh kawng tha kan nei te, vote thlak chhung zawnga min venna avang pawha Pathian hnena lawmthu sawi tur kan nih thu a sawi bawk.